నాగ్ అభిమానులకు ట్రీట్ రెడీ

కొంచెం గ్యాప్ తర్వాత అక్కినేని నాగార్జున లైన్లోకి వచ్చాడు. ఆయన కొత్త సినిమా ‘రాజు గారి గది-2’కు సంబంధించి ప్రచార హడావుడి మొదలైపోయింది. ఇప్పటిదాకా ఈ సినిమాకు సంబంధించి కొన్ని ఆన్ లొకేషన్ స్టిల్స్ తప్పితే ఇంకేమీ రిలీజ్ చేయలేదు. ఇప్పుడు ‘రాజు గారి గది-2’ లోగోను పరిచయం చేశారు. దీంతో పాటు త్వరలోనే మోషన్ పోస్టర్ లాంచ్ చేయబోతున్నట్లు కూడా ప్రకటించారు. ఇంకో మూడు రోజుల్లో.. అంటే ఆగస్టు 29న నాగార్జున పుట్టిన రోజు. ఆ రోజే ‘రాజు గారి గది-2’ ఫస్ట్ లుక్ మోషన్ పోస్టర్ లాంచ్ చేయబోతున్నారు. ఇంకో నెలన్నర లోనే ‘రాజు గారి గది-2’ ప్రేక్షకుల ముందుకు రాబోతున్న నేపథ్యంలో ఇక ప్రమోషన్ మొదలుపెట్టి జనాల్లోకి సినిమాను తీసుకెళ్లాల్సిన సమయం ఆసన్నమైందని చిత్ర బృందం భావిస్తోంది.

‘రాజు గారి గది-2’ షూటింగ్ కొన్ని నెలల కిందటే పూర్తయినప్పటికీ.. కొన్ని మార్పులు చేర్పులతో రీషూట్లు అవీ చేయడానికి కొంచెం సమయం పట్టింది. దీపావళి కానుకగా అక్టోబరు 13న ఈ చిత్రాన్ని విడుదల చేయాలని నిర్ణయించారు. యాంకర్ టర్న్డ్ డైరెక్టర్ ఓంకార్ దర్శకత్వంలో రూపొందుతున్న ఈ చిత్రంలో ‘రాజు గారి గది’లో నటించిన ఓంకార్ తమ్ముడు అశ్విన్ కూడా ఓ కీలక పాత్ర చేస్తున్నాడు. నాగార్జున కాబోయే కోడలు సమంతతో పాటు సీరత్ కపూర్ ముఖ్య పాత్రలు చేస్తున్నారు. పీవీపీ సినిమాస్ ఈ చిత్రాన్ని నిర్మిస్తోంది. నాగార్జున ఇందులో మోడర్న్ మాంత్రికుడి పాత్రలో నటిస్తున్నట్లు సమాచారం. ఆయన గెటప్ అదీ కొత్తగా ఉంటుందని అంటున్నారు. మరి ఫస్ట్ లుక్ మోషన్ పోస్టర్లో నాగ్ ఎలా కనిపిస్తాడో చూడాలి.