ఈ నక్షత్రాలు మెరుస్తున్నాయా గురూ?

ఒక సినిమా ఎప్పుడు రిలీజవుతుందో ముందే చెప్పి.. ఆ డేటుకు సినిమా వచ్చేలే డైరక్టరూ ప్రొడ్యూసర్లు అహిర్నశలూ పనిచేసి ఆ సినిమాను అదే టైముకు ధియేటర్లలోకి దించితే.. అది మంచి పనితనం అవుతుంది. లేదంటే సినిమా మొత్తం పూర్తయ్యాక.. ఎంత లేటైతే అంత లేటయ్యాక.. అప్పుడు ఫైనల్ గా ఒక రిలీజ్ డేటును చెప్పి ఆ తేదీన రిలీజ్ చేయడం ఒక పద్దతి.

కాకపోతే ఇప్పుడు కొన్ని సినిమాల సిట్యుయేషన్ ఎలా ఉందంటే.. నాన్నా పులి కథ టైపులో.. అదిగో రిలీజ్ డేట్ అంటున్నారు ఇదిగో వాయిదా అంటున్నారు. అసలు సినిమా ఫైనల్ గా వస్తున్నా కూడా జనాలు నమ్మలేని పరిస్థితి. ఇప్పుడు కృష్ణవంశీ డైరక్షన్లో సందీప్ కిషన్ సాయిదరమ్ తేజ్ లీడ్లో రూపొందిన ''నక్షత్రం'' పరిస్థితి అలాగే ఉంది. ఈ శుక్రవారం ఈ సినిమా రిలీజ్ అంటున్నారు కాని.. ఇప్పటివరకు సందీప్.. సాయిధరమ్.. రెజీనా.. ప్రగ్యా జైస్వాల్ ఇలా ఒక్కరు కూడా సినిమాను ప్రమోట్ చేస్తోందే లేదు. పొరపాటున కూడా వీరు టివిల్లో లేదంటే సోషల్ మీడియాల్లో కనిపించకపోవడం.. ఈ సినిమా గురించి ఒక్క మాట కూడా వినిపించకపోవడంతో.. అసలు సినిమా వస్తుందా రాదా ఎవ్వరికీ అర్ధంకావట్లేదు.

పోనివ్ ఆల్రెడీ అందరూ ప్రొడ్యూసర్ దగ్గర పైసల్ తీసుకునే సినిమా చేశారుగా.. కనీసం సినిమా రిలీజ్ డేట్ గురించైనా కాస్త గట్టిగా తమ తమ సోషల్ మీడియాల్లో ప్రచారం చేయొచ్చుగా అంటే.. అది కూడా లేదు. అందుకే ఈ శుక్రవారం ఈ నక్షత్రాలు మెరుస్తున్నాయా లేదా అనే సందేహం అందరికీ వచ్చేస్తోంది.