‘నక్షత్రం’ మళ్లీ వాయిదా

ఏడాదిన్నర కిందట మొదలైన సినిమా ‘నక్షత్రం’. గత ఏడాదే పూర్తయి విడుదల కావాల్సింది. కానీ అనివార్య కారణాల వల్ల ఆలస్యమవుతూ వచ్చింది. చివరికి ఈ ఏడాది వేసవిలో విడుదల చేయాలనుకున్నారు. పలుమార్లు విడుదల గురించి ప్రకటనలు ఇచ్చారు. చివరికి ఈ నెల 28న సినిమాను విడుదల చేస్తున్నట్లుగా ఇటీవలే అనౌన్స్ చేశారు. రిలీజ్ డేట్ పోస్టర్లు కూడా వదిలారు. కానీ ఈ తేదీకి కూడా ఆ సినిమా విడుదల కావల్లేదు. ఈ చిత్రాన్ని వారం ఆలస్యంగా ఆగస్టు 4న రిలీజ్ చేస్తామని తాజాగా ప్రకటన వచ్చింది. ఈ నెల 28న ‘గౌతమ్ నంద’ మంచి అంచనాల మధ్య రిలీజవుతున్న నేపథ్యంలో.. ఆగస్టు 4కు వెళ్లినట్లు తెలుస్తోంది.

రానా సినిమా ‘నేనే రాజు నేనే మంత్రి’ని ఆగస్టు 4 నుంచి 11కు వాయిదా వేసిన నేపథ్యంలో ఆ తేదీ మంచిదని భావించినట్లుంది. అదే రోజు సుకుమార్ నిర్మాణంలో తెరకెక్కిన ‘దర్శకుడు’ కూడా విడుదలవుతుంది. 28 నుంచి ‘నక్షత్రం’ వెళ్లిపోయిన నేపథ్యంలో ‘గౌతమ్ నంద’కు లైన్ క్లియరైనట్లే. అదే తేదీన రావాల్సిన తమిళ డబ్బింగ్ సినిమా ‘వీఐపీ-2’ కూడా వాయిదా పడటంతో ‘గౌతమ్ నంద’ సోలోగా థియేటర్లలోకి దిగబోతోంది. గోపీచంద్ కు ప్రస్తుతం హిట్టు చాలా అవసరం. ఈ సినిమాపై పెట్టుబడి కూడా ఎక్కువే పెట్టారు. కాబట్టి ఈ సినిమా సూపర్ హిట్ కావాల్సిందే. భగవాన్.. పుల్లారావు నిర్మించిన ఈ చిత్రానికి సంపత్ నంది దర్శకత్వం వహించాడు. హన్సిక మొత్వాని.. కేథరిన్ థ్రెసా కథానాయికలుగా నటించారు.