ఆది సరసన నమిత

అవును.. యువ కథానాయకుడు ఆది సరసన నమిత నటిస్తోంది. కాంబినేషన్ చాలా చిత్రంగా అనిపిస్తోంది కదా. ఆదితో నమిత నటిస్తున్న మాట వాస్తవమే కానీ.. ఇక్కడో చిన్న ట్విస్టుంది. ఈ నమిత ఆ నమిత కాదు. ఈ అమ్మాయి పూర్తి పేరు నమిత ప్రమోద్. మలయాళ కుట్టి. అక్కడ దాదాపు పది సినిమాల దాకా నటించి బాగానే పేరు తెచ్చుకుంది. తమిళంలో కూడా ఓ సినిమా చేసింది. ఇప్పుడు వీరభద్రం చౌదరి దర్శకత్వం వహించబోతున్న సినిమాతో తెలుగులో అడుగుపెడుతోంది. ఆ సినిమా పేరు.. చుట్టాలబ్బాయి. ఎప్పుడో ఆర్నెల్ల ముందే ఈ ప్రాజెక్టు ఓకే అయినప్పటికీ.. ఎట్టలకే విజయదశమి రోజు ఈ సినిమా సెట్స్ మీదికి వెళ్లింది.

అహనా పెళ్లంట - పూల రంగడు లాంటి హిట్ సినిమాలతో దర్శకుడిగా మంచి పేరు సంపాదించిన వీరభద్రం.. ‘భాయ్’ సినిమాతో పాతాళానికి పడ్డాడు. ఏ దర్శకుడికైనా ఫ్లాపులు మామూలే కానీ.. వీరభద్రం ‘భాయ్’ సినిమాతో చాలా చెడ్డ పేరు తెచ్చుకున్నాడు. ఆ దెబ్బతోనే తన తర్వాతి సినిమా మొదలు పెట్టడానికి రెండేళ్లు పట్టింది. వీరభద్రంను దర్శకుడిగా పరిచయం చేసిన అనిల్ సుంకరనే ఈ సినిమాను నిర్మిస్తున్నాడు. 14 రీల్స్ లో భాగస్వామి అయిన అనిల్ కూడా వరుస ఫ్లాపులతో ఇబ్బంది పడ్డాడు. ఆది సంగతి కూడా తెలిసిందే. అందరూ హిట్టు కొట్టి తీరాల్సిన స్థితిలో ‘చుట్టాలబ్బాయి’కి శ్రీకారం చుట్టారు. మరి ఎలాంటి ఫలితాన్నందుకుంటారో చూడాలి.