దేవ‌ర‌కొండ హీరోగా న‌మ్ర‌త‌ ప్లాన్స్

సూప‌ర్ స్టార్ మ‌హేష్ - న‌మ్ర‌త శిరోద్క‌ర్ జోడీ బిజినెస్ ప్లాన్స్ గురించి తెలిసిందే. ఓవైపు ఏఎంబీ సినిమాస్ పేరుతో మ‌ల్టీప్లెక్స్ బిజినెస్ లో విజ‌య‌వంతంగా అడుగుపెట్టారు. అలానే జి.మ‌హేష్ బాబు(జిఎంబీ) ఎంట‌ర్‌ టైన్ మెంట్స్ ప‌తాకంపై సినిమాలు నిర్మిస్తున్నారు. మ‌హేష్ క‌థానాయ‌కుడిగా న‌టిస్తున్న తాజా చిత్రం `స‌రిలేరు నీకెవ్వ‌రు` లో జిఎంబీ బ్యాన‌ర్ పెట్టుబ‌డులు పెడుతున్న సంగ‌తి తెలిసిందే. అలాగే ఈ బ్యాన‌ర్ లో ప‌లువురు యువ‌హీరోల‌తో సినిమాలు తీస్తుండ‌డం హాట్ టాపిక్.

ఇప్ప‌టికే `గూఢ‌చారి` ఫేం అడివి శేష్ క‌థానాయ‌కుడిగా మేజ‌ర్ అనే సినిమాని జీఎంబీ బ్యాన‌ర్ లో నిర్మిస్తున్నారు. 26/11 ముంబై దాడుల్లో చ‌నిపోయిన మేజ‌ర్ సందీప్ ఉన్నిక్రిష్ణ‌న్ జీవిత‌కథ ఆధారంగా ఈ సినిమా తెర‌కెక్క‌నుంది. ప్ర‌స్తుతం స్క్రిప్ట్ వ‌ర్క్ న‌డుస్తోంది. మ‌రోవైపు పీవీపీ బ్యాన‌ర్ లో `ఎవ‌రు` చిత్రీక‌ర‌ణ‌లో శేష్ బిజీగా ఉన్న‌ సంగ‌తి తెలిసిందే. త‌దుప‌రి `మేజ‌ర్` పైనా దృష్టి సారిస్తారు. అలాగే రౌడీ విజ‌య్ దేవ‌ర‌కొండ హీరోగా మ‌హేష్ బ్యాన‌ర్ లో ఓ సినిమా తెర‌కెక్క‌నుంద‌ని తెలుస్తోంది. ప్ర‌స్తుతం న‌మ్ర‌త ఆ ప‌నుల్లోనే బిజీగా ఉన్నార‌ట‌. అప్ప‌ట్లో ఓ పార్టీలో దేవ‌ర‌కొండ ఊహించ‌ని విధంగా మ‌హేష్ తో క‌నిపించారు. దాంతో మ‌హేష్ 26లో రౌడీ న‌టిస్తున్నాడంటూ ప్ర‌చారం సాగింది. కానీ దాని వెన‌క క‌థ వేరని తాజా స‌న్నివేశం చెబుతోంది. దేవ‌ర‌కొండ‌కు మ‌హేష్ - న‌మ్ర‌త‌ల బ్యాన‌ర్ లో క‌మిట్ మెంట్ ఉంద‌ని.. త్వ‌ర‌లోనే ఈ సినిమా ప్రారంభం కానుంద‌ని తెలుస్తోంది.

అలాగే విజ‌య్ దేవ‌ర‌కొండ‌తో మైత్రి సంస్థ మూడు సినిమాల డీల్ కుదిరింద‌ని వార్త‌లొచ్చాయి. డియ‌ర్ కామ్రేడ్ త‌ర్వాత మ‌రో సినిమా ఈ బ్యాన‌ర్ లోనే తెర‌కెక్క‌నుంది. అటుపై మ‌హేష్ బ్యాన‌ర్ సినిమాని ప‌ట్టాలెక్కిస్తార‌ని తెలుస్తోంది. మొత్తానికి ఘట్ట‌మ‌నేని మ‌హేష్ ఎంట‌ర్ టైన్ మెంట్స్ ఇత‌ర అగ్ర నిర్మాణ సంస్థ‌ల బాట‌లోనే తెలివైన అడుగులు వేస్తోంద‌ని అర్థ‌మ‌వుతోంది.