లెజెండ్ హీరో పాత కథ.. కొత్త రిస్క్ అవసరమా..?

తెలుగు సినీ ఇండస్ట్రీలో నటసింహం అంటేనే నందమూరి బాలకృష్ణ. ఆయన చివరిగా అందుకున్న బ్లాక్ బస్టర్ 'లెజెండ్'. ఆ సినిమా తర్వాత చాలా సినిమాలే తీశారు కానీ లెజెండ్ అంత రేంజ్ కి ఏది వెళ్ళలేదు. ముఖ్యంగా బాలయ్య-బోయపాటి శ్రీను కాంబినేషన్ లో వచ్చిన రెండు సినిమాలు ఇండస్ట్రీలో తిరుగులేని విజయాలను, అవార్డులు రివార్డులను సొంతం చేసుకున్నాయన్న సంగతి అందరికి తెలిసిందే.

ఇటీవల బాలయ్య-బోయపాటి ల కాంబినేషన్లో మరో సినిమా రాబోతుంది అంటే అభిమానులలో అంచనాలు ఆకాశాన్ని తాకుతున్నాయి. ప్రస్తుతం ఇద్దరికీ హిట్లు లేవు. మరి ముచ్చటగా మూడోసారి జతకట్టే సరికి సింహ, లెజెండ్ లాంటి హిస్టరీ రిపీట్ అవుతుందా..? అని సినీ వర్గాలలో సందేహాలు వ్యక్తం అవుతున్నాయి. బోయపాటి దర్శకత్వంలో బాలయ్య బాబు సినిమా అంటే డాన్సులు, ఫైట్లు, డైలాగ్స్ భారీ లెవెల్ లో ఎక్సపెక్ట్ చేస్తారు. ఈ సినిమాలో ఎలాంటి మ్యాజిక్ చూపించనున్నారో అని ఆసక్తి నెలకొంది.

ఈ సినిమా తర్వాత బాలకృష్ణ తనకి గతంలో మంచి హిట్లు అందించిన సీనియర్ దర్శకుడు బి. గోపాల్ తో కొత్త సినిమాని చేసేందుకు ప్లాన్ చేస్తున్నాడని తెలుస్తుంది. గతంలో బాలకృష్ణ-బి గోపాల్ కాంబినేషన్ లో లారీ డ్రైవర్, రౌడీ ఇన్‌స్పెక్టర్, సమరసింహా రెడ్డి, నరసింహ నాయడు లాంటి సూపర్‌ హిట్ సినిమాలు వచ్చాయి. చివరగా వీళ్లిద్దరి కాంబినేషన్ లో 'పల్నాటి బ్రహ్మనాయుడు' చిత్రం తెరకెక్కింది. ఈ చిత్రం బాక్సాఫీస్ దగ్గర ఘోర పరాజయం పాలైంది. ఆ తర్వాత 'హర హర మహదేవ ' అనే సినిమాని మొదలుపెట్టినప్పటికీ సినిమా మధ్యలోనే ఆగిపోయింది.

ఇప్పుడు ఈ సీనియర్‌ డైరెక్టర్‌ బాలయ్య హీరోగా సినిమా చేసేందుకు రెడీ అవుతున్నాడట. ఇప్పటికే ఇద్దరి మధ్య కథ చర్చలు కూడా జరిగాయని బాలయ్య కూడా దీనికి ఓకె చెప్పినట్టుగా ప్రచారం జరుగుతోంది. వచ్చే జూన్ నెల 10న లాంఛనంగా సినిమా ముహూర్తం చేయనున్నారని టాక్. ఈ కొత్త సినిమా ప్రకటన బాలయ్య పుట్టినరోజున ఉంటుందని జోరుగా ప్రచారం జరుగుతుండగా ఈ సినిమా ఆగిపోయిందని షాక్ న్యూస్. ఎందుకంటే.. సాయి మాధవ్ బుర్రా రాసిన కథ.. సూపర్ స్టార్ రజినీకాంత్ ‘దర్భార్' సినిమాకు దగ్గర పోలిక ఉందట. పాత కథతో కొత్త రిస్క్ ఎందుకని సినిమాను ఆపేసినట్లు సినీ వర్గాలు మాట్లాడుకుంటున్నాయి.