నంద‌మూరి అభిమానులూ.. పండ‌గ చేస్కోండి!

నంద‌మూరి అభిమానుల‌కు కిక్కెక్కించే వార్త ఇది. ఎన్నాళ్లుగానో.. ఆ మాట‌కొస్తే ఎన్నేళ్లుగానో వారు ఎదురుచూస్తున్న రేయి ఈ రోజు ఆవిష్కృతం కాబోతోంది. నంద‌మూరి కుటుంబ‌మంతా ఒకే వేదిక‌పైకి రాబోతోంది. అది కూడా బ‌హిరంగ వేదిక‌పైకి.

ఆంధ్రుల అభిమాన న‌టుడు - దివంగ‌త ముఖ్య‌మంత్రి నంద‌మూరి తార‌క రామారావు జీవిత చ‌రిత్ర ఆధారంగా క్రిష్ జాగ‌ర్ల‌మూడి ద‌ర్శ‌క‌త్వంలో ‘యన్.టి.ఆర్’ చిత్రం తెర‌కెక్కింది. ఎన్టీఆర్ కుమారుడు బాల‌కృష్ణ ఇందులో త‌న తండ్రి పాత్ర పోషించారు. సినిమా ఆడియో విడుద‌ల వేడుక హైదరాబాద్‌ లో ఈ రోజు రాత్రి జరగబోతోంది. ఈ కార్య‌క్ర‌మానికి జూనియ‌ర్‌ ఎన్టీఆర్ స‌హా నందమూరి కుటుంబ సభ్యులందరూ హాజ‌రుకానున్నారు.

జూనియ‌ర్‌ ఎన్టీఆర్‌ కు బాలయ్యే స్వయంగా ఫోన్ చేసి మరీ ఈ వేడుకకు ఆహ్వానించార‌ట‌. దీంతో ఆయ‌న కుటుంబ స‌భ్యులంతా రావాల‌ని నిశ్చ‌యించుకున్నార‌ని తెలుస్తోంది. మిగతా నందమూరి వాళ్లు కూడా కుటుంబాలతోనే హాజరు కానున్నట్లు సమాచారం. కాబ‌ట్టి మొత్తం జంబో ఫ్యామిలీని ఒకే వేదిక‌పై చూడబోతున్నట్లే.

ఇలా బహిరంగ వేడుకలో నంద‌మూరి ఫ్యామిలీ మొత్తం ఒకే వేదిక‌ను పంచుకున్న‌ది చివ‌రిసారిగా ఎప్పుడంటే చెప్ప‌డం కూడా క‌ష్ట‌మే. కుటుంబ సంబంధిత‌ కార్యక్రమాల్లో వాళ్లంతా కలిసి పాల్గొంటూ ఉండొచ్చు. కానీ వాటికి సంబంధించిన ఫొటోలు, వీడియోలు బయటికి రావ‌డం అరుదు. వచ్చినా కూడా అందులో ఫ్యామిలీ మెంబర్స్ ఒక్కటిగా కనిపించరు! ముఖ్యంగా జూనియర్ ఎన్టీఆర్ వాటిలో ఉండ‌రు! తాజా వేడుక‌కు మాత్రం జూనియ‌ర్ స‌హా బాల‌కృష్ణ‌ - క‌ళ్యాణ్ రామ్ ఇలా అంతా హాజ‌రవుతుండ‌టంతో అభిమానులంతా ఉత్సాహంగా ఎదురుచూస్తున్నారు. ముఖ్యంగా బాల‌య్య - జూనియ‌ర్ ఈ కార్య‌క్ర‌మంలో ప‌ర‌స్ప‌రం ఎలా మెలుగుతారోన‌న్న‌ది అంద‌రిలోనూ ఆస‌క్తి రేకెత్తిస్తోంది.