బర్త్ డే స్పెషల్ గా నాలుగు సినిమాలు ప్రకటించిన నందమూరి హీరో..!

నంద‌మూరి క‌ళ్యాణ్‌ రామ్ నేడు (జూలై 5) తన పుట్టినరోజు సందర్భంగా క్రేజీ ప్రాజెక్టులను ప్రకటిస్తూ ఫుల్ జోష్ లో ఉన్నారు. ఇప్పటికే వశిష్ట్ దర్శకత్వంలో చేస్తున్న 'బింబిసార' అనే సోషల్ ఫాంటసీ మూవీ సెట్స్ పై ఉండగా.. ఈరోజు సోమవారం మరో నాలుగు కొత్త సినిమాల అనౌన్స్ మెంట్ ఇచ్చేశారు. కల్యాణ్‌ రామ్‌ తన 19వ చిత్రాన్ని మైత్రీ మూవీ మేకర్స్‌ బ్యానర్‌ లో చేయనున్నారు. నవీన్ ఎర్నేని - వై. రవిశంకర్ నిర్మించే ఈ చిత్రానికి రాజేంద్ర రెడ్డి దర్శకత్వం వహించనున్నారు. దీనికి జిబ్రాన్ సంగీతం సమకూరుస్తుండగా.. సుందర్ రాజన్ సినిమాటోగ్రఫీ అందించనున్నారు. #NKR19 ప్రాజెక్ట్ కు సంబంధించిన ఇతర వివరాలు త్వరలోనే వెల్లడికానున్నాయి.

ఇకపోతే నందమూరి హీరో తన 20వ చిత్రాన్ని శ్రీ వెంకటేశ్వర క్రియేషన్స్‌ బ్యానర్‌ లో ప్రకటించారు. గతంలో కల్యాణ్ రామ్ తో '118' చిత్రాన్ని రూపొందించిన సినిమాటోగ్రాఫర్ కమ్ డైరెక్టర్ కేవీ గుహన్ ఈ చిత్రానికి దర్శకత్వం వహించనున్నారు. దిల్ రాజు నిర్మిస్తున్న '#NKR20' సినిమా ఇన్వెస్టిగేటివ్ క్రైమ్ థ్రిల్లర్ గా తెరకెక్కుతోందని అనౌన్స్ మెంట్ పోస్టర్ చూస్తే అర్థం అవుతోంది. ఈ సినిమాలో తారాగణం, సాంకేతిక నిపుణుల వివరాలు త్వరలోనే వెల్లడికానున్నాయి.

అలానే నవీన్ మేడారం అనే కొత్త దర్శకుడిని ఇండస్ట్రీకి పరిచయం చేస్తూ.. కళ్యాణ్ రామ్ ''డెవిల్'' అనే పాన్ ఇండియా మూవీని ప్రకటించారు. దేవాన్ష్ నామా సమర్పణలో అభిషేక్‌ పిక్చర్స్‌ బ్యానర్‌ పై అభిషేక్ నామా ఈ చిత్రాన్ని నిర్మిస్తున్నారు. 1945 బ్రిటిష్ ఇండియా బ్యాక్ డ్రాప్ లో రూపొందుతున్న ఈ చిత్రంలో కళ్యాణ్ రామ్ బ్రిటీష్ సీక్రెట్ ఏజెంట్ గా కనిపించనున్నాడు. ఈరోజు విడుదలైన ఆసక్తికరమైన ఫస్ట్ లుక్ పోస్టర్ లో నందమూరి గెటప్ సర్ప్రైజింగ్ గా ఉంది. శ్రీకాంత్ విస్సా కథ అందిస్తున్న ఈ చిత్రానికి హర్షవర్ధన్ రామేశ్వర్ సంగీతం సమకూరుస్తున్నారు. కళ్యాణ్ రామ్ కెరీర్ లో 21వ చిత్రంగా వస్తున్న 'డెవిల్'.. తెలుగు తమిళ కన్నడ హిందీ భాషల్లో రిలీజ్ చేయనున్నారు.

నందమూరి హీరోకి బర్త్ డే విషెస్ అందిస్తూ తన 22వ చిత్రానికి సంబంధించిన అధికారిక ప్ర‌క‌ట‌న ఇచ్చారు. ఈస్ట్‌ కోస్ట్ ప్రొడ‌క్ష‌న్స్ బ్యాన‌ర్‌ పై నిర్మాత మహేష్ కోనేరు ఈ చిత్రాన్ని నిర్మించ‌నున్నారు. దర్శకుడు ఎవరనేది మేకర్స్ ప్రకటించలేదు. ఇంత‌కు ముందు క‌ళ్యాణ్‌ రామ్ ఇదే బ్యాన‌ర్‌ లో '118' అనే సస్పెన్స్ క్రైమ్ థ్రిల్లర్ లో నటించిన సంగతి తెలిసిందే. ఈ క్రమంలో మ‌రోసారి వీరి కలయికలో చేయ‌బోయే చిత్రం వ‌చ్చే ఏడాది సెట్స్‌ పైకి వెళ్ల‌నుందని సమాచారం. #NKR22 చిత్రానికి ద‌ర్శ‌కుడు, న‌టీన‌టులు, సాంకేతిక నిపుణులు వంటి ఇతర వివరాల‌ను తరువాత వెల్లడించనున్నారు. ఇలా కళ్యాణ్ రామ్ ప్రకటించిన నాలుగు సినిమాలు కూడా బయట ప్రొడక్షన్ హౌస్ లలోనే రూపొందుతుందటం గమనార్హం. మరి ఈ క్రేజీ ప్రాజెక్టులతో ఎలాంటి విజయాలను అందుకుంటాడో చూడాలి.