‘మెంటల్’ చర్చలోకి బాలయ్యను లాగారే..

రచయిత.. దర్శకుడు.. నటుడు పోసాని కృష్ణమురళిని ‘మెంటల్ కృష్ణ’ అనే సినిమా ఒకటి చేసిన సంగతి తెలిసిందే. ఆ సినిమా తర్వాత ఆయన్ని ఎవరైనా విమర్శించాల్సి వస్తే మెంటల్ కృష్ణ అనేస్తుంటారు. తాజాగా నంది అవార్డుల విషయమై పోసాని ఆంధ్రప్రదేశ్ మంత్రి నారా లోకేష్ మీద తీవ్ర స్థాయిలో విరుచుకుపడిన నేపథ్యంలో జరిగిన ఓ టీవీ ఛానెల్ చర్చలో ఓ అతిథి.. పోసాని మీద విమర్శలు చేస్తూ ఆయన్ని ‘మెంటల్ కృష్ణ’ అనేశారు. దీనిపై ఇతరుల నుంచి అభ్యంతరాలు వ్యక్తం కాగా.. తాను సరదాగానే ఆ మాట వాడానని.. పోసాని తనకు సన్నిహితుడే అని ఆ వ్యక్తి కవర్ చేసే ప్రయత్నం చేశాడు.

ఐతే ఈ చర్చా కార్యక్రమానికి అతిథిగా విచ్చేసిన వైఎస్సార్ కాంగ్రెస్ మాజీ నేత.. ప్రస్తుతం టీఆర్ ఎస్ పార్టీలో ఉన్న గట్టు రామచంద్రరావు.. ఈ చర్చను మరో మలుపు తిప్పారు. పోసానిని మెంటల్ కృష్ణ అనడంపై అభ్యంతరం వ్యక్తం చేసిన ఆయన.. అసలు ‘మెంటల్ కృష్ణ’ ఎవరో తేలాలని అన్నారు. ఈ సందర్భంగా ఆయన బెల్లంకొండ సురేష్ మీద నందమూరి బాలకృష్ణ కాల్పులు జరపడం.. ఈ కేసు కోర్టుకు చేరాక.. ఎర్రగడ్డ ఆసుపత్రి నుంచి తన మానసిక స్థితి సరిగా లేదని బాలయ్య సర్టిఫికెట్ తీసుకురావడం గురించి ఆయన ప్రస్తావించారు. ఈ రకంగా చూస్తే అసలైన మెంటల్ కృష్ణ ఎవరో అందరికీ అర్థమవుతుందని.. సినిమా తీశాడు కాబట్టి పోసానిని ‘మెంటల్ కృష్ణ’ అనడం కరెక్ట్ కాదని గట్టు అన్నారు.