నందిని రెడ్డి తర్వాతి సినిమా అతడితోనా?

తొలి సినిమాతో మంచి హిట్టు కొట్టి రెండో సినిమాతో బోల్తా కొట్టిన దర్శకులు చాలామంది టాలీవుడ్లో ఉన్నారు. నందిని రెడ్డిని సైతం ఈ ద్వితీయ విఘ్నం సెంటిమెంటును తప్పించుకోలేకపోయింది. ‘జబర్దస్త్’ సినిమా ఫ్లాపవడమే కాక.. ఆమెకు చాలా చెడ్డ పేరు కూడా తెచ్చిపెట్టింది. దీంతో తొలి సినిమా కంటే కూడా మూడో సినిమాకు ముందు చాలా ఒత్తిడి ఎదుర్కొంది నందిని. ఐతే అంత ఒత్తిడిలోనూ మంచి సినిమానే తీసింది. ‘కళ్యాణ వైభోగమే’లో నందిని ముద్ర స్పష్టంగా కనిపించింది. ఈ సినిమాకు ప్రేక్షకుల నుంచి, విమర్శకుల నుంచి మంచి స్పందన వస్తోంది. ఇండస్ట్రీ జనాలు కూడా నందినిపై ప్రశంసల జల్లు కురిపిస్తున్నారు.

శుక్రవారం మధ్యాహ్నం నుంచి నందిని ఫోన్ మోగుతూనే ఉందట. చాలామంది ఆమెకు కంగ్రాట్స్ చెప్పి సినిమా చేద్దామని అడుగుతున్నారట. ఓ పెద్ద నిర్మాణ సంస్థ నందినితో సినిమా చేయడానికి అంగీకారం కూడా కుదుర్చుకుందట. ఆ సినిమా మీడియం రేంజిలో ఉంటుందని సమాచారం. ఈ చిత్రంలో నాని హీరోగా నటించే అవకాశాలున్నట్లు సమాచారం. ప్రస్తుతానికి చర్చలు ప్రాథమిక దశలో ఉన్నాయి. నందిని తొలి సినిమా ‘అలా మొదలైంది’లో నానినే హీరో అన్న సంగతి తెలిసిందే. ఆ సినిమా ఇద్దరి కెరీర్ లకూ బాగా ఉపయోగపడింది. నందినికి, నానికి మంచి రాపో కూడా ఉంది. ఆమెతో సినిమా అంటే నాని కాదనే ప్రసక్తే ఉండదు. వేరే కమిట్ మెంట్లు చాలా ఉన్నప్పటికీ నందిని సినిమాలో నాని నటించడానికి ఓకే అన్నట్లు సమాచారం.