మనకి రీమేక్ లు సెట్ కావు బాసూ

ప్రతి హీరోలోను ఒక ప్రత్యేకమైన లక్షణమేదో ఉంటుంది. ఆ ప్రత్యేకత లేకపోతే వాళ్లు స్టార్ స్టేటస్ ను అందుకోలేరు. తమకంటూ కొంతమంది అభిమానులను సంపాదించుకోలేరు. సినిమా హిట్టా .. ఫ్లాపా? అనే విషయాన్ని పక్కన పెడితే, ఒక హీరో సినిమా చూడటానికి ప్రేక్షకులు థియేటర్ కి వస్తున్నారంటేనే, ఆ హీరోను వాళ్లు అంగీకరించారని అర్థం. ఇక హీరోలు అది నిలబెట్టుకోవడానికే ఎప్పటికప్పుడు ప్రయత్నిస్తూ వస్తుంటారు. తమదైన దారిలో వెళుతూనే విజయాలను అందుకోవడానికి కృషి చేస్తుంటారు. అభిమానుల సంఖ్యను ఎప్పటికప్పుడు పెంచుకోవడానికి కష్టపడుతుంటారు.

అయితే ప్రతి హీరోకి కొన్ని నిర్ణయాలు .. అభిప్రాయాలు ఉంటాయి. వాటిని మార్చుకోవడానికి వాళ్లు ఎంతమాత్రం ప్రయత్నించరు. తమకి సెట్ కావని అనిపించిన అంశాల జోలికి వాళ్లు ఎంతమాత్రం వెళ్లరు. తనకి పౌరాణికాలు .. చారిత్రకాలు ఎంతమాత్రం సెట్ కావని గతంలో ఒక సందర్భంలో మహేశ్ బాబు చెప్పాడు. దానికి కట్టుబడే ఆయన తన బాడీ లాంగ్వేజ్ కి తగిన సినిమాలను చేస్తూ వెళుతున్నాడు. ఎన్నికోట్లు ఆఫర్ చేసినా ఆయన ఆ జోనర్ సినిమాలు చేయరనేది అందరికీ అర్థమైపోయింది. ఇక నాని కూడా రీమేక్ ల విషయంలో అంతే బలమైన అభిప్రాయంతో ఉన్నాడు.

తెలుగులో సీనియర్ స్టార్ హీరోలు సైతం రీమేక్ సినిమాలు చేస్తున్నారు. తమిళ .. మలయాళ సినిమాల రీమేకులు ఇప్పుడు చాలానే సెట్స్ పై ఉన్నాయి. నాని మాత్రం రీమేక్ లు చేయడానికి ఇష్టపడటం లేదు. "నాకు రీమేక్ లు సెట్ కావనే విషయం నాకు అర్థమైపోయింది. ఆ దిశగా ప్రయత్నించి దెబ్బతిన్నాను కూడా. అందువలన అప్పుడే నిర్ణయించుకున్నాను .. ఇక పై రీమేక్ లు చేయకూడదని. ఒక భాషలో వచ్చిన సినిమా రీమేక్ లో నేను చేయడం కంటే, నేను చేసిన సినిమా రీమేక్ లో వేరే హీరో చేయడం నాకు సంతోషాన్ని కలిగిస్తుంది.

అలా అని రీమేక్ లో చేసేవారిని నేను తప్పుపట్టడం లేదు. అవి వారికి సెట్ అవుతున్నాయి కనుక చేస్తున్నారు .. నాకు మాత్రం రీమేకులు సెట్ కావు. అందువలన భవిష్యత్తులో కూడా రీమేకులు చేసే ఆలోచన లేదు" అంటూ, 'శ్యామ్ సింగ రాయ్' ప్రమోషన్స్ లో తనకి ఎదురైన ప్రశ్నకి సమాధానంగా ఆయన చెప్పుకొచ్చాడు. నాని కెరియర్లోనే అత్యధిక బడ్జెట్ నిర్మితమైన సినిమా ఇది. కథాకథనాల పరంగా .. లుక్ పరంగా నాని చేసిన ప్రయోగమే ఈ సినిమా. ఈ నెల 24వ తేదీన ఈ సినిమా ప్రేక్షకుల ముందుకు రానుంది. ఈ సినిమా తనకి పెద్ద హిట్ తెచ్చిపెడుతుందనీ .. తన కెరియర్లోనే ప్రత్యేకమైన సినిమాగా నిలుస్తుందనే బలమైన నమ్మకంతో నాని ఉన్నాడు.