ఫిబ్రవరి 5.. నాని వెర్సస్ శీను

పెద్ద పెద్ద సినిమాలకు సైతం రిలీజ్ డేట్ల విషయంలో చాలా తలనొప్పులు తప్పట్లేదు ఈ మధ్య. అందుకే చాలా ముందే డేట్లు ఫిక్స్ చేసుకోవడానికి పోటీ పడుతున్నారు నిర్మాతలు. సంక్రాంతి విషయంలో ఎంత పోటీ ఉందో తెలిసిందే. జనవరిలో ఓ మోస్తరు సినిమాలు కూడా ఇంకేవీ విడుదల కావడం కష్టమే. అందుకే జనవరి నెలను పెద్దోళ్లకు వదిలేసి ఓ మోస్తరు సినిమాలన్నీ ఫిబ్రవరికి వెళ్తున్నాయి. ఇప్పటికే ఆ నెల తొలి వారానికి బెర్తులు బుక్ అయిపోయాయి. ఫిబ్రవరి 5వ తారీఖున రెండు మీడియం రేంజి సినిమాలు రిలీజ్ కాబోతున్నాయి. అందులో ఒకటి నాని సినిమా కాగా.. ఇంకోటి బెల్లంకొండ శ్రీను హీరోగా తెరకెక్కుతున్నది.

హను రాఘవపూడి దర్శకత్వంలో 14 రీల్స్ పతాకంపై నాని హీరోగా ఓ సినిమా తెరకెక్కుతున్న సంగతి తెలిసిందే. జనవరి 1న ఈ చిత్ర టైటిల్ - ఫస్ట్ లుక్ ప్రకటించబోతున్నారు. అదే నెల 10వ తారీఖున ఆడియో రిలీజ్ చేయబోతున్నారు. ఈ చిత్రానికి ‘జై బాలయ్య’ అనే టైటిల్ ప్రచారంలో ఉన్న సంగతి తెలిసిందే. సినిమాను ఫిబ్రవరి 5న ప్రేక్షకుల ముందుకు తేబోతున్నారు. మరోవైపు బెల్లంకొండ శీను హీరోగా భీమనేని శ్రీనివాసరావు రూపొందిస్తున్న ‘స్పీడున్నోడు’ కూడా ఇదే డేటు ఫిక్స్ చేసుకుంది. ఇది ‘సుందర పాండ్యన్’ అనే తమిళ హిట్ మూవీకి రీమేక్ గా తెరకెక్కుతోంది. బెల్లంకొండ సురేష్ బ్యాకప్ తో భీమనేనే స్వయంగా ఈ చిత్రాన్ని నిర్మిస్తుండటం విశేషం.