ఫోటో స్టొరీ: న్యాచురల్ స్టార్.. పేరు దొంగ!

న్యాచురల్ స్టార్ నాని నటించిన కొత్త సినిమా 'జెర్సీ' రేపు ప్రేక్షకుల ముందుకు రానుంది. ఈ సినిమాలో నాని పోషించిన క్రికెటర్ పాత్ర పేరు 'అర్జున్'. మరి అర్జున్ అనే పేరు రియల్ లైఫ్ లో ఎవరిదో తెలుసు కదా? నాని తనయుడి పేరే అర్జున్. ముద్దు పేరు మాత్రం జున్ను. అంటే నాని తన కొడుకు పేరే తన పాత్రకు పెట్టుకున్నాడు.

ఈ విషయాన్ని హైలైట్ చేస్తూ ఒక ఫన్నీ క్యాప్షన్ ఉండే ఫోటోను నాని తన ట్విట్టర్ ఖాతా ద్వారా షేర్ చేశాడు. ఈ ఫోటో కు"సారీరా జున్ను.. తప్పలేదు" అంటూ ట్వీట్ చేశాడు. ఇక ఫోటోలో నాని.. జున్ను ఇద్దరూ సముద్రం వ్యూ ఉండే ఒక బిల్డింగ్ పై కూర్చుని ఉన్నారు. ఇద్దరూ వైట్ టీ-షర్టులే వేసుకున్నారు. నాని షర్టు పై జెర్సీ నంబర్ "36 అర్జున్' అని రాసి ఉంది. కానీ జున్ను షర్టు పై మాత్రం "మా నాన్న నా పేరును కొట్టేశాడు" అని ఉంది. ఫోటోలో తండ్రికొడుకులు ఇద్దరూ కబుర్లలో మునిగిపోయి ఉన్నారు.

నెటిజనులకు ఈ ఫోటో తెగ నచ్చేసింది. అసలు ఆ పేరుకొట్టేశాడనే క్యాప్షన్ టీ షర్ట్ పై ప్రింట్ చేయించాలనే ఐడియా ఎవరికి వచ్చిందోకానీ సూపరో సూపరు. అసలే 'జెర్సీ' విడుదల జోష్ లో ఉన్న నాని అభిమానులుఈ ఫోటోను లైకులతో హోరెత్తిస్తున్నారు. ఇప్పటికే ఈ ఫోటో సోషల్ మీడియాలో వైరల్ అయిపోయింది. నాని - జున్ను ఎపిసోడ్ చూస్తే నాగార్జున సినిమాలు కూడా కొన్ని గుర్తొస్తున్నాయి. నాగార్జున కూడా చైతు పేరుతో.. 'చైతన్య' అనే టైటిల్ తో సినిమా చేశాడు. ఇక 'సూపర్' సినిమాలో నాగ్ పాత్ర పేరు అఖిల్.. ఈ లెక్కన 'దాసు' ఒక కొడుకు పేరు మాత్రమే వాడుకుంటే 'దేవా' తన ఇద్దరు కొడుకుల పేర్లను కొట్టేసినట్టే!