నాని-నిత్య: అలా మొదలౌతుందట!

న్యాచురల్ స్టార్ నాని 'దేవదాస్' సినిమా షూటింగ్ పూర్తయింది. కింగ్ నాగార్జున తో కలిసి నటించిన ఈ మల్టిస్టారర్ ఈ నెలాఖరున రిలీజ్ కానుంది. ఇక ఈ సినిమా తర్వాత వెంటనే తన నెక్స్ట్ ఫిలిం 'జెర్సీ' షూటింగ్ లో పాల్గొంటాడు నాని. స్పోర్ట్స్ డ్రామా గా తెరకెక్కుతున్న ఈ సినిమాలో ఒక క్రికెటర్ పాత్రలో కనిపిస్తాడు. ఇక ఈ సినిమాలో కష్మీర పరదేశి ని హీరోయిన్ గా తీసుకున్నారు.

తాజా సమాచారం ప్రకారం ఈ సినిమాలో నిత్యా మీనన్ ను మరో హీరోయిన్ గా తీసుకున్నారట. నాని - నిత్య జోడీ వయసుమళ్ళిన జంటగా కన్పిస్తారట. నిత్య మీనన్ ఫుల్ లెంగ్త్ రోల్ కానప్పటికీ సినిమాలో మాత్రం చాలా కీలకమైనదట. నాని - నిత్య కలిసి నటించడం ఇది మూడో సారి. మొదటి సారి ఇద్దరూ సూపర్ హిట్ రొమాంటిక్ కామెడి 'అలా మొదలైంది' లో హీరో హీరోయిన్లు గా నటించారు. ఆ సినిమా 2011 లో విడుదలైంది. ఆ తర్వాత అదే ఏడాది 'వెప్పం'(తెలుగులో 'సెగ') అనే తమిళ సినిమాలో కలిసి నటించారు. అంటే ఇప్పుడు ఏడేళ్ళ తర్వాత మళ్ళీ నాని-నిత్య జంటను తెలుగు ప్రేక్షకులు తెరమీద చూడబోతున్నారన్నమాట.

ఈ సినిమాలో క్రికెటర్ పాత్ర పోషించేందుకు నాని క్రికెట్ ట్రైనింగ్ కూడా తీసుకుంటున్నాడట. గౌతమ్ తిన్ననూరి దర్శకత్వంలో తెరకెక్కనున్న ఈ సినిమాను సితార ఎంటర్టైన్మెంట్స్ బ్యానర్ వారు నిర్మిస్తున్నారు.