నాని-సుధీర్ మ‌ల్టీస్టార‌ర్ టైటిల్?

బ‌యోపిక్ ట్రెండ్ .. మ‌ల్టీస్టార‌ర్ ట్రెండ్ జోడు గుర్రాల్లా ప‌రిగెడుతున్నాయి. టాలీవుడ్ లో భారీ బ‌డ్జెట్ల‌తో వ‌రుస‌గా మ‌ల్టీస్టార‌ర్లు తెర‌కెక్కుతున్నాయి. వీటికి మార్కెటింగ్ ప‌రంగానూ స్పాన్ ఎక్కువ‌గా ఉండ‌డంతో మ‌న ద‌ర్శ‌క‌నిర్మాత‌లు ఆ త‌ర‌హా క‌థ‌ల్ని వండి వారుస్తున్నారు. ఈ కేట‌గిరీలోనే `నాని-సుధీర్-ఇంద్ర‌గంటి మ‌ల్టీస్టార‌ర్` వేడెక్కిస్తోంది. శ్రీ‌వెంక‌టేశ్వ‌ర క్రియేష‌న్స్ ప‌తాకంపై దిల్ రాజు ఈ చిత్రాన్ని నిర్మిస్తున్నారు. ఇంత‌కీ ఈ మ‌ల్టీస్టార‌ర్ టైటిల్ ఏంటి? అంటే ఇన్నాళ్లు స‌స్పెన్స్.

తాజా స‌మాచారం ప్ర‌కారం `వ్యూహం` అనే టైటిల్ ని ఖ‌రారు చేశార‌ని తెలుస్తోంది. టైటిల్ కి త‌గ్గ‌ట్టే ఇది పూర్తి స్థాయి యాక్ష‌న్ డ్రామా. ఇందులో సుధీర్ బాబు ఓ ప‌వ‌ర్ ఫుల్ పోలీసాఫీస‌ర్ గా న‌టిస్తున్నారు. నేచుర‌ల్ స్టార్ నాని ఓ నెగెటివ్ షేడ్ ఉన్న పాత్ర‌లో న‌టించ‌నున్నారు. నాని న‌టించిన క్రికెట్ బ్యాక్ డ్రాప్ మూవీ `జెర్సీ` రిలీజ్ కి రెడీ అవుతున్న సంగ‌తి తెలిసిందే. త‌దుప‌రి విక్ర‌మ్.కె.కుమార్ ప్రాజెక్టు పూర్త‌వ్వ‌గానే ఇంద్ర‌గంటితో సెట్స్ కి వెళ్లేందుకు ప్ర‌ణాళిక‌లు ర‌చిస్తున్నారు. నాని - ఇంద్ర గంటి కాంబినేష‌న్ లో గ‌తంలో అష్టాచెమ్మా, జెంటిల్‌ మేన్ చిత్రాలు రిలీజై బ్లాక్ బ‌స్ట‌ర్లు కొట్టిన సంగ‌తి తెలిసిందే. ఆ ఇద్ద‌రి క‌ల‌యిక‌లో హ్యాట్రిక్ చిత్ర‌మిది.

మ‌రోవైపు హీరో సుధీర్ బాబు పుల్లెల గోపి చంద్ బ‌యోపిక్ లో న‌టిస్తున్న సంగ‌తి తెలిసిందే. ప్ర‌స్తుతం శ‌ర‌వేగంగా చిత్రీక‌ర‌ణ సాగుతోంది. నాని- ఇంద్ర‌గంటి మూవీతో జాయిన్ కావ‌డానికి సుధీర్ బాబు సైతం ఆస‌క్తిగా ఉన్నారు. ఆ క్ర‌మంలోనే షెడ్యూల్స్ ని ప్లాన్ చేస్తున్నార‌ని తెలుస్తోంది. 2018లో సుధీర్ బాబుకు `స‌మ్మోహ‌నం` లాంటి హిట్ చిత్రాన్ని ఇచ్చారు ఇంద్ర‌గంటి. ఆ క్ర‌మంలోనే నాని- సుధీర్ బాబు - ఇంద్ర‌గంటి కాంబినేష‌న్ మూవీపై ఇండ‌స్ట్రీలో అంత‌కంత‌కు ఆస‌క్తి పెరుగుతోంది.