బాలయ్య అభిమానిగా నాని?

టాలీవుడ్‌కు దొరికిన మంచి నటుల్లో నాని ఒకడు. కెరీర్లో కమర్షియల్ సక్సెస్‌లు తక్కువే కావచ్చు. కానీ మనోడి టాలెంట్ గురించి టాలీవుడ్ జనాలకు బాగా తెలుసు. ఎప్పుడూ ఎవరితోనూ వివాదాలు పెట్టుకోకుండా అందరితో చాలా పద్ధతిగా ఉండే నానికి ఇండస్ట్రీలో చాలా మంచి పేరుంది. ఐతే అతడి కొత్త సినిమా నానికి ఇబ్బందులేమైనా తెచ్చిపెడుతుందేమో అన్న గుసగుసలు వినిపిస్తున్నాయి టాలీవుడ్ సర్కిల్స్‌లో. ప్రస్తుతం మారుతి దర్శకత్వంలో ‘భలే భలే మగాడివోయ్’ సినిమా చేస్తున్న నాని.. దీని తర్వాత ‘అందాల రాక్షసి’ ఫేమ్ హను రాఘవపూడి డైరెక్షన్లో ఓ సినిమా చేయబోతున్న సంగతి తెలిసిందే.

ఇందులో నాని బాలయ్య అభిమాన సంఘం అధ్యక్షుడిగా నటించబోతున్నట్లు సమాచారం. ఈ సంగతి తెలియగానే భలే ఆసక్తి మొదలైంది. గతంలో మన హీరోలు ఎన్టీఆర్, చిరంజీవి, రజినీకాంత్ లాంటి హీరోల అభిమానులుగా నటించడం చూశాం. కానీ బాలయ్య అభిమానిగా ఎవరూ నటించనట్లు లేదు. మరి బాలయ్య అభిమానిగా నాని ఏం చేస్తాడా.. బాలయ్య డైలాగులేమైనా పేలుస్తాడా అన్నది ఆసక్తికరంగా మారింది. బాలయ్య ఫ్యాన్స్ కూడా ఈ క్యారెక్టర్‌ను ఎలా రిసీవ్ చేసుకుంటారో చూడాలి. బాలయ్యతో ‘లెజెండ్’ లాంటి బ్లాక్‌బస్టర్ తీసిన 14 రీల్స్ వాళ్లు ఈ సినిమాను నిర్మిస్తుండటం విశేషం. దీనిపై పూర్తి వివరాలు తెలియాలంటే ఇంకొంత కాలం ఆగాల్సిందే.