'శ్యామ్ సింగరాయ్' సెట్లో నాని బర్త్ డే వేడుకలు!

టాలీవుడ్ నేచురల్ స్టార్ నాని పుట్టినరోజు సెలెబ్రేషన్స్ ప్రస్తుతం నటిస్తున్న 'శ్యామ్ సింగరాయ్' చిత్రబృందం సెట్ లోనే గ్రాండుగా జరిపింది. పీరియాడిక్ డ్రామాగా తెరకేక్కుతున్న ఈ సినిమాకు టాక్సీవాలా ఫేమ్ రాహుల్ సంకృత్యాన్ దర్శకత్వం వహిస్తున్నాడు. ప్రస్తుతం ఈ సినిమా షూటింగ్ కలకత్తాలో శరవేగంగా జరుగుతుంది. అయితే తమ హీరో పుట్టినరోజు సందర్బంగా సినీబృందం భారీ కేక్ కట్ చేయించినట్లు తెలుస్తుంది. ప్రస్తుతం సోషల్ మీడియాలో నాని పుట్టినరోజు సెలెబ్రేషన్స్ ఫోటోలు వైరల్ అవుతున్నాయి. శ్యామ్ సింగరాయ్ టీమ్ తో నాని కేక్ ముందు నిలబడి ఫోటోకు పోజిచ్చాడు. చూస్తుంటే ఫోటోలో శ్యామ్ సింగరాయ్ టీమ్ మొత్తం దిగినట్లుగా కనిపిస్తుంది.

అంతేగాక శ్యామ్ సింగరాయ్ లో హీరో నానికి సంబంధించిన క్యారెక్టర్ గెటప్ పోస్టర్ కూడా విడుదల చేసి ట్రీట్ ఇచ్చింది బృందం. పోస్టర్ చూస్తే అప్పటి నేటివిటిని పక్కా ప్రణాళికతో సెట్ చేసినట్లుగా తెలుస్తుంది. అప్పటి డ్రెస్సింగ్ స్టైల్, అలాగే మీసకట్టు.. ప్యాంటు షర్టు.. ఇలా అన్ని నాని అభిమానులను థ్రిల్ చేస్తున్నాయి. ఇదిలా ఉండగా శ్యామ్ సింగరాయ్ టీమ్ ఫోటోలో కూడా నాని అదే మీసకట్టుతో దర్శనమిచ్చాడు. నానితో పాటుగా కేక్ కటింగ్ ప్రోగ్రాంకు డైరెక్టర్ రాహుల్, తదితరులు హాజరయ్యారు. భారీ బడ్జెట్ తో ఈ సినిమాను వెంకట్ బోయినపల్లి నిర్మిస్తున్నారు. ఇక ఈ సినిమాలో నాని సరసన ముగ్గురు హీరోయిన్స్.. సాయిపల్లవి, కృతిశెట్టి, మడోనా సెబాస్టియన్ నటిస్తున్నారు. ఇక్కడ ఆసక్తికరమైన విషయం ఏంటంటే.. ఈ హీరోయిన్స్ ముగ్గురు కూడా తెలుగువారు కాకపోవడమే. తెలుగులో ఈ హీరోయిన్స్ తమ సత్తా చాటేందుకు రెడీ అవుతున్నారు.