నాని రెండు సినిమాలు కన్ఫమ్ చేశాడు

ప్రస్తుతం టాలీవుడ్లో మాంచి జోరుమీదున్న యువ కథానాయకుల్లో నాని పేరు ముందు చెప్పుకోవాలి. ఏడాదికి రెండు మూడు రిలీజులుండేలా చూసుకుంటున్నాడు నేచురల్ స్టార్. క్వాంటిటీ మీద దృష్టిపెట్టి క్వాలిటీ విషయంలో ఏమీ రాజీ పడట్లేదతను. గత మూడేళ్లలో నాని నటించిన సినిమాలన్నీ బాగా ఆడాయి. ఈ శుక్రవారం రాబోతున్న ‘నిన్ను కోరి’ మీద కూడా మంచి అంచనాలే ఉన్నాయి. ఈ సినిమా విడుదలకు ముందే నాని.. దిల్ రాజు నిర్మాణంలో వేణు శ్రీరామ్ దర్శకుడిగా ‘ఎంసీఏ’ సినిమాను మొదలుపెట్టిన సంగతి తెలిసిందే. దీని తర్వాత తాను చేయబోయే మరో రెండు సినిమాల విశేషాల్ని కూడా మీడియాకు వెల్లడించాడు నాని.

కొన్నాళ్లుగా వార్తలొస్తున్నట్లుగానే ‘వెంకటాద్రి ఎక్స్ ప్రెస్’.. ‘ఎక్స్ ప్రెస్ రాజా’ సినిమాల దర్శకుడు మేర్లపాక గాంధీతో ఓ సినిమా చేయబోతున్నట్లు ధ్రువీకరించాడు నాని. ఈ సినిమా ఆగస్టులోనే ప్రారంభోత్సవం జరుపుకుంటుందన్నాడు. ‘నిన్ను కోరి’ విడుదలైన వారం రోజుల్లో ఈ సినిమా టైటిల్.. కథాంశం ఏంటి.. ఇతర విశేషాలు వెల్లడిస్తానన్నాడు. ఈ చిత్రంతో గాంధీని కొత్తగా చూస్తారని అతను చెప్పాడు. సెప్టెంబర్లో ఈ చిత్రం రెగ్యులర్ షూటింగ్ మొదలవుతుందన్నాడు. దీని తర్వాత ‘కృష్ణగాడి వీర ప్రేమ గాథ’తో తనకు మంచి విజయాన్నందించిన హను రాఘవపూడితో మరోసారి జత కట్టబోతున్నట్లు నాని వెల్లడించాడు. ఆ చిత్రం మిలిటరీ నేపథ్యంలో సాగుతుందని.. ఈ సినిమాకు సంబంధించిన పూర్తి వివరాలు తర్వాత చెబుతానని నాని తెలిపాడు. మొత్తానికి ఇంకో ఏడాది పాటు నాని డైరీ ఫుల్లయిపోయినట్లే అన్నమాట.