నాని.. 24తో ఇంట్రెస్టింగ్ కనెక్షన్

నేచురల్ స్టార్ నాని పుట్టిన రోజు ఆదివారమే. ఈ రోజు తేదీ ఫిబ్రవరి 24న అన్న సంగతి తెలిసిందే. ఐతే 24 నంబర్‌తో నానికి చాలా కనెక్షన్లు ఉండటం విశేషం. ప్రస్తుతం విక్రమ్ కుమార్ దర్శకత్వంలో నాని నటిస్తున్న సినిమా అతడి కెరీర్లో 24వది కావడం విశేషం. ఇక విక్రమ్ కుమార్ ‘24’ టైటిల్‌ తో ఒక సినిమా తీసిన సంగతి తెలిసిందే. దీంతో పాటుగా 24 నంబర్‌ తో తనకున్న అనుబంధం గురించి తాజాగా ఒక ఇంటర్వ్యూలో ఆసక్తికర విషయాలు వెల్లడించాడు నాని. ఆ ముచ్చట్లేంటో అతడి మాటల్లోనే తెలుసుకుందాం పదండి.

‘‘చిన్నప్పటి నుంచి 24 అంకెతో విచిత్రమైన కనెక్షన్ ఉంది. నేను ఎప్పుడైనా ట్రైన్‌ టికెట్ లేదా ఫ్లైట్‌ టికెట్‌ కొంటే అనుకోకుండా 24వ సీట్‌ రావడం చాలాసార్లు జరిగింది. అలాగే నేను ఇల్లు కొనుక్కుంటే అది ఫ్లాట్‌ నం. 24 కావడం చూసి ఆశ్చర్యపోయా. ఇక నేను పని చేస్తున్నది 24 శాఖలున్న సినీ ఇండస్ట్రీలో. నా పుట్టిన రోజు 24. హీరోగా నా కెరీర్‌ స్టార్ట్‌ అయింది సరిగ్గా 24 ఏళ్లకు. ఇదంతా విచిత్రంగా అనిపిస్తుంటుంది. అది యాదృచ్ఛికమో.. దానికేమైనా కనెక్షన్‌ ఉందో నాకు తెలియదు. సరే ఇన్ని కనెక్షన్‌లు ఉన్నాయి కదా అని నా కారు నెంబర్లు కూడా 24 కలిసొచ్చేలా పెట్టించుకున్నాను. ఈ నంబర్ లక్కీ అని కాదు కానీ.. నాకు 24తో ఓ చిన్న ఎమోషన్‌ ఏర్పడిన మాట వాస్తవం’’ అని నాని తెలిపాడు. ఇదిలా ఉంటే విక్రమ్ దర్శకత్వంలో నాని నటిస్తున్న సినిమాకు ‘గ్యాంగ్ లీడర్’ అనే టైటిల్ ఖరారు చేయడం విశేషం.