బిగ్ బాస్ లో మ‌ళ్లీ అనుకున్న‌దే జ‌రిగిందిగా!

లీకులే నిజ‌మ‌య్యాయి. గ‌డిచిన కొద్ది రోజులుగా బిగ్ బాస్ షోను టీవీలో చూసే క‌న్నా.. సోష‌ల్ మీడియాలో పాలో కావ‌టం బెట‌ర‌న్న మాట‌కు త‌గ్గ‌ట్లే.. ఈ వారం ఎలిమినేష‌న్ ముందే లీకైంది. కొన్ని వారాలుగా ఎవ‌రు ఎప్పుడు ఎలిమినేట్ అవుతున్నార‌న్న విష‌యం సోష‌ల్ మీడియాలో ఒక‌ట్రెండు రోజుల ముందే వైర‌ల్ అవుతోంది.

తాజాగా పూజా రామ‌చంద్రం బిగ్ బాస్ హౌస్ నుంచి ఈ వారం వెళ్లిపోతార‌న్న అంచ‌నా ఏ మాత్రం తేడా కొట్ట‌కుండా ఆమె బ‌య‌ట‌కు వెళ్లిపోయారు. రాఖీ రోజున‌.. బిగ్ బాస్ హౌస్ లో రాఖీ పండుగ‌ను నిర్వ‌హించారు. షో ను నిర్వ‌హిస్తున్న నాని బిగ్ బాస్ హౌస్ లోకి వ‌చ్చారు. సినిమాల్లో త‌న తొలి షాట్ సంద‌ర్భంలోనూ ఇంత‌గా ఎగ్టైట్ కాలేద‌ని.. కానీ.. బిగ్ బాస్ హౌస్ లోకి అడుగు పెట్టే స‌మ‌యంలో మాత్రం తాను విప‌రీత‌మైన భావోద్వేగానికి గురైన‌ట్లు చెప్పారు.

బిగ్ బాస్ హౌస్ లో ఉన్న కంటెస్టెంట్ల కుటుంబీకుల నుంచి వ‌చ్చిన రాఖీల్ని.. సందేశాల్ని.. గిఫ్ట్ ల‌ను తీసుకొని నాని హౌస్ లోకి వ‌చ్చారు.

సంద‌డి సంద‌డిగా గ‌డిపిన త‌ర్వాత నాని ఇంటి నుంచి తెచ్చిన ఫుడ్ తో అంద‌రూ క‌డుపునిండా భోజ‌నం చేశారు. అనంత‌రం.. త‌మ వాళ్ల నుంచి వ‌చ్చిన గ్రీటింగ్స్ ను అందుకున్నారు. ఆనంత‌రం ఎలిమినేష‌న్ కార్య‌క్ర‌మాన్ని హౌస్ లోనే చేప‌ట్టారు నాని. మిగిలిన ఎలిమినేష‌న్ కు భిన్నంగా ఈ వారం ఎలిమినేష‌న్ ఉంటుంద‌ని.. ఎప్ప‌టిలా కాకుండా స్టేజ్ మీద కాకుండా హౌస్ లోనే ఎలిమినేష‌న్ ఉంటుంద‌ని చెప్పిన నాని.. ఎలిమినేష‌న్ ఎదుర్కొంటున్న కౌశ‌ల్‌.. త‌నీశ్‌.. దీప్తిలు సేఫ్ జోన్ లో ఉన్న‌ట్లు చెప్పిన నాని.. ఈవారం ఎలిమినేష‌న్ పూజా రామచంద్ర‌న్ గా పేర్కొన్నారు.

బిగ్ బాస్ హౌస్ లోకి వైల్డ్ కార్డ్ ఎంట్రీ రూపంలో 43వ రోజు హౌస్ లోకి వ‌చ్చిన పూజ గ‌డిచిన రెండు వారాలుగా కౌశ‌ల్ తో పాటు.. హౌస్ లోని ప‌లువురితో గొడ‌వ‌ల‌కు దిగి త‌న ఆట‌ను మ‌ర్చిపోయార‌న్న పేరుంది. దీంతో.. ఆమె ఇంటి నుంచి బ‌య‌ట‌కు రాక త‌ప్ప‌లేదు.

ఇదిలా ఉంటే.. ఎలిమినేష‌న్ నిర్ణ‌యాన్ని వెల్ల‌డించ‌టానికి ముందు పూజా గురించి నాని పొగిడేశారు. భాష రాకున్నా.. గేమ్ మ‌ధ్య‌లో వ‌చ్చినా.. పూజా రోల్ ను రీప్లేస్ చేయ‌టం క‌ష్ట‌మ‌ని.. ఆమె ఆట‌లోకి వ‌చ్చిన త‌ర్వాత రూప‌మే మారిందంటూ కితాబులు ఇచ్చారు. ఇదంతా ఒక ఎత్తు అయితే.. కెప్టెన్సీని చేజేతులారా పోగొట్టుకున్న దీప్తికి తిరిగి కెప్టెన్సీ ఇవ్వాల్సిందిగా బిగ్ బాస్ ను నాని కోర‌టంతో అందుకు సానుకూలంగా స్పందించారు. ఇక‌.. ఇటీవ‌ల టాస్క్ లో గెలిచిన సామ్రాట్ రూ.ల‌క్ష‌ను వారి కుటుంబ స‌భ్యులు కేర‌ళ వ‌ర‌ద బాధితుల స‌హాయార్తం పంపిన‌ట్లుగా నాని చెప్ప‌గా.. సామ్రాట్ తో పాటు మిగిలిన హౌస్ మేట్స్ హ‌ర్షం వ్య‌క్తం చేశారు.

ఎలిమినేట్ అయిన పూజ బిగ్ బాంబ్‌ను గీతామాధురికి వేశారు. వారం పాటు రాత్రిళ్లు జైల్లో ప‌డుకోవాల‌న్న బిగ్ బాంబ్ ను త‌న మీద వేయాల‌ని గీతామాధురి కోర‌టంతో పూజ అందుకు అంగీక‌రించారు. ఈ వారంలో రాత్రిళ్లు వ‌ర్షం ప‌డితే గీతా ఎంజాయ్ చేస్తుంద‌న్న మాట‌ను ఆమె చెప్పారు. మిగిలిన కంటెస్టెంట్ల మాదిరి తాను ఎలిమినేష‌న్ కావ‌టాన్ని పూజ భావోద్వేగంగా తీసుకోకుండా స్పోర్టివ్ గా వ్య‌వ‌హ‌రించ‌టం ప‌లువురి దృష్టిని ఆక‌ర్షించింది.