ఎక్స్‌పెక్టేష‌న్స్‌ కు మ్యాచ్ అయ్యేలా చూసుకుంటున్నాడా...?

నేచుర‌ల్ స్టార్ నాని కెరీర్ స్టార్టింగ్ నుంచి కూడా తనదైన శైలిలో సినిమాలు చేస్తూ ఆడియన్స్ మనసు దోచుకున్నాడు. ఫస్ట్ మూవీ 'అష్టాచమ్మ' తోనే తన సహజమైన నటనతో అలరించిన నాని ఎంటర్టైన్మెంట్ చిత్రాల ద్వారా ప్రేక్షకులకు బాగా దగ్గరయ్యాడు. 'అలా మొదలైంది' 'ఈగ' 'మజ్ను' ''భలే భలే మగాడివోయ్' 'నేను లోకల్' 'ఎంసీఏ' 'నిన్ను కోరి' వంటి చిత్రాలతో మంచి విజయాలు అందుకున్నాడు. అయితే అప్పుడప్పుడు కొన్ని ప్రయోగాలు చేసినా అవి పెద్దగా ప్రేక్షకులను ఆకట్టుకోలేకపోయాయి. ఈ క్రమంలో ఇటీవల నాని కెరీర్లో 25వ చిత్రంగా వచ్చిన 'వి' సినిమా కూడా నిరాశపరిచింది. ఓటీటీలో రిలీజ్ అయిన ఈ సినిమాకి మొదటి నుంచే మిశ్రమ స్పందన వచ్చింది. ఈ నేపథ్యంలో నాని తదుపరి సినిమాల విషయంలో మరింత జాగ్రత్తలు తీసుకోవాలని నిర్ణయించుకున్నట్లు తెలుస్తోంది.

కాగా, నాని ప్రస్తుతం శివ నిర్వాణ దర్శకత్వంలో 'టక్ జగదీష్' అనే సినిమాలో నటిస్తున్నాడు. ఇప్పటికే రెండు షెడ్యూల్స్ ఫినిష్ చేసుకున్న ఈ సినిమా కరోనా కారణంగా వాయిదా పడింది. దీంతో పాటు 'టాక్సీవాలా' ఫేమ్ రాహుల్ సంక్రీత్య‌న్ డైరెక్షన్ లో 'శ్యామ్ సింగ రాయ్' అనే సినిమాకి గ్రీన్ సిగ్నల్ ఇచ్చాడు నాని. అంతేకాకుండా 'మెంటల్ మదిలో' ఫేమ్ వివేక్ ఆత్రేయ‌తో ఒక సినిమా.. శ్రీ‌కాంత్ ఓడెల అనే కొత్త దర్శకుడితో ఓ సినిమా చేయ‌నున్నాడని తెలుస్తోంది. అయితే 'వి' రిజల్ట్ తో ఆలోచనలో పడ్డ నాని ఈ సినిమాలలో ఎంటర్టైన్మెంట్ పాళ్ళు ఎక్కువ ఉండేలా చూడమని దర్శకులను కోరుతున్నాడట. త్వరలో తిరిగి సెట్స్ లో అడుగుపెట్టబోతున్న 'టక్ జగదీశ్' స్క్రిప్ట్ లో ఎమోషనల్ కంటెంట్ ని తగ్గించి.. కామెడీ ఎంటర్టైన్మెంట్ ఎక్కువగా ఉండేలా చూడమని డైరెక్టర్ శివ నిర్వాణ ని కోరాడట. ఈసారి ఎక్స్పెక్టేషన్స్ కి మ్యాచ్ కాలేదని మాట రాకుండా చూసుకుంటున్నాడట. 'ట‌క్ జ‌గ‌దీష్' గోదావరి జిల్లాల నేటివిటీతో తెరకెక్కబోతోందని.. గోదావరి జిల్లాల ప్రజలు మాట్లాడే యాస‌తో నాని మాట్లాడబోతున్నాడని సమాచారం.