జెంటిల్ మ్యానే కొత్త బిగ్ బాస్

జూనియర్ ఎన్టీఆర్ ఫస్ట్ బిగ్ బాస్ సీజన్ ని సక్సెస్ చేసాక మళ్ళి అంతగా మెప్పించే స్టార్ ఎవరు వస్తారా అనే సస్పెన్స్ కి తెరపడినట్టే. న్యాచురల్ స్టార్ నాని తారక్ ప్లేస్ లో పార్టిసిపెంట్స్ తో కలిసి సందడి చేయనున్నాడని విశ్వసనీయ సమాచారం. జూన్ లేదా జూలైలో పూణే వేదికగా దీని షూటింగ్ మొదలయ్యే అవకాశం ఉంది. ఇంతకు ముందు అల్లు అర్జున్, రానా అంటూ పలు పేర్లు వినిపించాయి కాని చివరికి నాని దగ్గరే దీనికి చెక్ పడినట్టు టాక్. అధికారిక ప్రకటన ఇంకా రావాల్సి ఉంది. స్టార్ మా ఛానల్ తో ఎండోమెల్ ఇండియా సంయుక్తంగా నిర్వహించే ఈ ప్రోగ్రాంకి పలు సంప్రదింపుల తర్వాతే నానితో ఓకే చేయించినట్టు టాక్. ప్రస్తుతం నాని మార్కెట్ ఫుల్ స్వింగ్ లో ఉంది. తన టైమింగ్ తో రక్తి కట్టించే నాని దీనికి పర్ఫెక్ట్ గా సూట్ అవుతాడని అభిమానులు కూడా అభిప్రాయం వ్యక్తం చేస్తున్నారు.

తొలుత హైదరాబాద్ లోనే షూట్ చేయాలనే ప్రతిపాదన ఉన్నప్పటికీ స్థల భావం, బిగ్ బాస్ హౌస్ ని పునర్నిర్మించే సౌలభ్యం, వెసులుబాటు ఇక్కడ లేకపోవడం వల్లే వెన్యు పూణేకి షిఫ్ట్ అయినట్టు తెలుస్తోంది. నాని మరో పది రోజుల్లోపే దీనికి సంబంధించి సైన్ చేయబోతున్నట్టు తెలిసింది. ప్రస్తుతం బిగ్ బాస్ 2 లో పార్టిసిపెంట్స్ కోసం పరిశీలన వడబోత లోలోపలే సాగిస్తున్నట్టు వినికిడి. ఫస్ట్ సిరీస్ లో వీక్ డే ఎపిసోడ్స్ కొంచెం డ్రై గా నడిచాయి అన్న కామెంట్స్ వచ్చిన నేపధ్యంలో హోస్ట్ లేకపోయినా పార్టిసిపెంట్స్ తో ఆసక్తికరంగా దీన్ని మలిచేలా చాలా మార్పులే చేసారని ఇన్ సైడ్ టాక్.

నానికి ఇది కొత్త ఛాలెంజ్. రియాలిటీ షోలకు సీక్వెల్ యాంకరింగ్ చేయటం కత్తి మీద సాము లాంటిది. ఇదే స్టార్ మా ఛానల్ లో మీలో ఎవరు కోటీశ్వరుడు యాంకర్ మారాక స్పందనలో తేడా వచ్చిన సంగతి తెలిసిందే. హిందిలో సైతం కౌన్ బనేగా కరోడ్ పతి పగ్గాలు అమితాబ్ నుంచి షారుఖ్ తీసుకునప్పుడు కూడా ఇదే సమస్య. కాని నాని స్టైల్, ప్రెజెంటేషన్ బిగ్ బాస్ 2 ని కొత్త లెవెల్ కు తీసుకెళ్లడం ఖాయమని ఇటు స్టార్ మా అటు ఫాన్స్ ఇద్దరూ నమ్మకంగా ఉన్నారు.