ఆ చిన్న సినిమా కోసం నాని..

నేచురల్ స్టార్ నానిది లక్కీ హ్యాండ్ అని ఇండస్ట్రీ జనాల నమ్మకం. అతడి చేతుల మీదుగా ‘పెళ్ళి చూపులు’ టీజర్ లాంచ్ చేస్తే అది ఏ రేంజికి వెళ్లిందో తెలిసిందే. ఆ తర్వాత ‘గృహం’ సినిమా థియేట్రికల్ ట్రైలర్ లాంచ్ కార్యక్రమానికి కూడా నానీనే ముఖ్య అతిథిగా వచ్చాడు. ట్రైలర్ లాంచ్ చేశాడు. అది మంచి విజయం సాధించింది. ఈ మధ్య ‘భాగమతి’ ప్రి రిలీజ్ ఈవెంట్లోనూ నానీనే ముఖ్య అతిథి. ఆ సినిమా కూడా బాగా ఆడింది. ఈ నేపథ్యంలో ఒక చిన్న సినిమా నిర్మాత నానిని సంప్రదిస్తే.. వచ్చి దానికి సపోర్ట్ చేయడం విశేషం. ఆ సినిమా పేరు.. ‘పరిచయం’. ఈ సినిమా టీజర్ నాని చేతుల మీదుగా లాంచ్ అయింది.

విరాట్ కొందారు.. సిమ్రత్ కౌర్ అనే కొత్త హీరో హీరోయిన్లు నటిస్తున్న సినిమా ఇది. ఇంతకుముందు ‘హైదరాబాద్ నవాబ్స్’.. ‘నిన్న నేడు రేపు’ లాంటి సినిమాలు రూపొందించిన లక్ష్మీకాంత్ చెన్నా ఈ చిత్రాన్ని రూపొందిస్తున్నాడు. టీజర్లో విజువల్స్.. మ్యూజిక్ అన్నీ ఆహ్లాదకరంగా అనిపిస్తున్నాయి. టీజర్లో ఒకటే డైలాగ్ ఉంది. ‘‘ఈ ప్రపంచంలో ప్రతి ఒక్కరూ తమ ప్రాణాల కన్నా ఎక్కువగా దేన్ని ప్రేమించలేరు.. కానీ నా లక్ష్మి అలా కాదురా.. తన ప్రాణాని కన్నా ఎక్కువ ప్రేమించింది నన్ను.. మీలో ఎవరైనా మీ ప్రాణాల్ని మిమ్మల్ని ప్రేమించిన వాళ్ల కోసం ఇవ్వగలరా’’.. ఇదీ ఆ డైలాగ్. ఇదొక నిజ జీవిత ప్రేమ కథ ఆధారంగా తెరకెక్కిన సినిమా అట. త్వరలోనే ఈ చిత్రం ప్రేక్షకుల ముందుకు రానుంది.