నెల మధ్యలో నాని వస్తున్నాడంతే

హీరో నాని.. ఇప్పుడు టాలీవుడ్ లో ఒకప్పటి రవితేజ అండ్ అల్లరి నరేష్‌ టైపులో.. వరుసపెట్టి ఏడాది పొడువునా సినిమాలతో హంగామా చేస్తూనే ఉన్నాడు. ఈ ఏడాది ఆల్రెడీ రెండు సినిమాలతో విచ్చేశాడు. కృష్ణగాడి వీరప్రేమగాధ యావరేజ్ గా ఆడినా కూడా.. జెంటిల్మన్ తో పెద్ద హిట్టే కొట్టాడు. ఇలా రెండుసార్లు ట్రీట్ ఇచ్చాక మూడోసారి కూడా వస్తున్నాడు.

మనోడు ''మజ్నూ'' సినిమాతో వస్తున్నాడనే విషయం తెలిసిందే కాని.. అసలు సెప్టెంబర్ నెలలో ఏ తేదీన వస్తాడనే విషయం మాత్రం ఇంకా నిర్ణయించుకోలేదని ఆల్రెడీ చెప్పుకున్నాం. బయటకు చెప్పట్లేదు కాని.. ట్రేడ్ వర్గాలందరికీ నాని తన సినిమాను సెప్టెంబర్ 16న వస్తున్నట్లు చెప్పేశాడట. సెప్టెంబర్ 1న జనతా గ్యారేజ్ వస్తుండగా.. సెప్టెంబర్ 9న ప్రేమమ్ - ఈడు గోల్డ్ ఏహా - ఇంకొక్కడు సినిమాలు రిలీజ్ చేయాలని ప్లాన్ చేశారు. వారి ప్లాన్స్ ఎలా ఉన్నా కూడా.. తాను మాత్రం 16న దిగడం గ్యారంటీ అంటున్నాడు ఈ న్యాచురల్ స్టార్. అంటే సెప్టెంబర్ నెల మధ్యన కరక్టుగా టార్గెట్ పెట్టేశాడనమాట.

ఉయ్యాల జంపాల ఫేం విరించి వర్మ డైరక్షన్లో రూపొందిన ఈ ''మజ్నూ'' సినిమాలో నాని సరసన అనూ ఇమానుయేల్ - ప్రియ లద్వాని అనే ఇద్దరు కొత్తమ్మాయిలు నటిస్తున్నారు. ఆగస్టు 26న గోపిసుందర్ కంపోజ్ చేసిన ఆడియో రిలీజ్ అవుతోంది.