ట్రైల‌ర్ టాక్‌: ప్రేమ ర‌సం కాదు రా... చ‌ట్నీ

ప్ర‌తిసారీ ఓ విభిన్న‌మైన క‌థ‌తో ప్రేక్ష‌కుల ముందుకొస్తున్న క‌థానాయ‌కుడు నాని. క‌థని మాత్ర‌మే న‌మ్మే అతి కొద్దిమందిలో నాని ఒక‌రు. క‌థ బాగోలేక‌పోతే అవ‌త‌ల స్టార్ ద‌ర్శ‌కుడైనా స‌రే ఒప్పుకోడ‌ని అంటుంటారు. నిజంగానే అంత ప్రామిసింగ్‌ గా ఉంటాయి నాని ఎంచుకొనే క‌థ‌లు. త్వ‌ర‌లోనే ఆయ‌న మ‌జ్నుతో ప్రేక్ష‌కుల ముందుకు రాబోతున్నాడు. ఉయ్యాలా జంపాలా ఫేమ్ విరించి వ‌ర్మ ద‌ర్శ‌క‌త్వం వ‌హిస్తున్న చిత్ర‌మిది. ఆదివారం జ‌రిగిన ఆడియో విడుద‌ల వేడుక‌లో ట్రైల‌ర్‌ ని విడుద‌ల చేశారు. అది చూశాక ఈ సినిమా కూడా నాని కొల‌త‌ల ప్ర‌కార‌మే తెర‌కెక్కింద‌న్న విష‌యం అర్థ‌మ‌వుతోంది.

ఇద్ద‌ర‌మ్మాయిలు - ఓ అబ్బాయి మ‌ధ్య సాగే ప్రేమాయ‌ణంతో ఈ చిత్రం తెర‌కెక్కింది. తాను ప్రేమించే అమ్మాయి - ఒక‌రు త‌న‌ని ప్రేమించే అమ్మాయి మ‌ధ్య న‌లిగిపోయే యువ‌కుడిగా నాని క‌నిపించ‌నున్న‌ట్టు ట్రైల‌ర్‌ నిబ‌ట్టి అర్థ‌మ‌వుతోంది. నాని ఈ సినిమాలో ఓ అసిస్టెంట్ డైరెక్ట‌ర్ పాత్ర‌ని చేశాడు. డైలాగులు అదిరిపోయేలా ఉన్నాయి. అన్నింట్లోకంటే నాని - వెన్నెల కిషోర్ మ‌ద్య వ‌చ్చే డైలాగే ట్ర‌యిల‌ర్‌ లో హైలెట్‌ గా నిలిచింది. `మీ క‌థ‌లో న‌వ‌స‌రసాలు ఉన్నాయి కానీ భ‌య్యా.. మ‌రి ప్రేమ‌` అని వెన్నెల కిషోర్ అంటే, నాని... `ప్రేమ ర‌సం కాదు రా... చ‌ట్నీ` అంటాడు. ఆ డైలాగ్ అదిరిపోయింది. ట్రైల‌ర్‌ లో తొలి స‌న్నివేశంలోనే రాజ‌మౌళి వెన‌కాల నుంచి క‌నిపిస్తుండ‌డం విశేషం.