కొత్త బిరుదు పెడితే.. హిట్ కొట్టినట్టే

సినీ హీరోలందు స్టార్ హీరోలు వేరయా అన్నారు సినిమా పెద్దోళ్లు. హీరోలుగా నిలదొక్కుకుని తర్వాత స్టార్లుగా మారేవారు కొందరైతే.. వారసత్వంగా ఫస్ట్ మూవీకే స్టార్ అయిపోయేవాళ్లు మరికొంతమంది. అయితే.. టాలీవుడ్ లో చిన్న హీరోల నుంచి కొత్త స్టార్స్ పుట్టుకొస్తున్నారు. అంటే.. ఆ డైరెక్టర్లు అలా బిరుదులు ఇచ్చుకుంటున్నారు లెండి. కానీ బిరుదు తగిలించి స్టార్ స్టేటస్ ఇచ్చిన సినిమాలు సక్సెస్ అవుతుండడం విశేషం.

ఆ మధ్య సుడిగాడు సినిమా కోసం అల్లరి నరేష్ కి సడెన్ స్టార్ అంటూ బిరుదు తగిలించారు. ఆ మూవీ స్టార్ హీరో రేంజ్ లోనే డబ్బులు తెచ్చిపెట్టింది. తర్వాత సంపూర్ణేష్ బాబుతో సినిమా తీసి.. బర్నింగ్ స్టార్ అన్నారు మూవీ మేకర్స్. అది కూడా ప్రేక్షకులను ఆకట్టుకుని హిట్ అనిపించుకుంది. ఇప్పుడు భలేభలే మగాడివోయ్ సినిమా కోసం నాని ని స్టార్ చేసేశాడు మారుతి. సహజంగా అయితే ఇతగాడిని బోర్న్ యాక్టర్ అని పిలుచుకుంటారు. కానీ మారుతి మాత్రం నానికి న్యాచురల్ స్టార్ అని నేమ్ వేశాడు. ఈ సినిమా ఏ రేంజ్ సక్సెస్ సాధిస్తోందో చూస్తున్నాం. టాలీవుడ్ కి కొత్త స్టార్లు.. పెద్ద సక్సెస్ లే తెచ్చిపెడుతుండడం విశేషం.