నానీ.. ఈ స్థాయిలో ఊహించలేదయ్యో

నాని కొత్త సినిమా ‘నిన్ను కోరి’ ట్రైలర్.. మిగతా ప్రోమోస్ పాజిటివ్ గానే అనిపించినప్పటికీ ఈ సినిమా అందరికీ నచ్చుతుందా.. నాని గత సినిమా ‘నేను లోకల్’ తరహాలో వసూళ్లు రాబడుతుందా అని అందరికీ సందేహం కలిగింది. ఈ సినిమా చూశాక కూడా చాలామంది ఇదే అభిప్రాయం వ్యక్తం చేశారు. కానీ ఆ సందేహాల్ని పటాపంచలు చేస్తూ ‘నిన్ను కోరి’ తొలి వారాంతంలో అదిరిపోయే వసూళ్లు రాబట్టింది. ఏకంగా రూ.27 కోట్ల గ్రాస్.. రూ.16 కోట్లకు పైగా షేర్ వసూలు చేసి ఆశ్చర్యపరిచింది. ఐతే మిగతా ప్రాంతాల్లో వసూళ్లన్నీ ఒకెత్తయితే.. అమెరికాలో ఈ చిత్రం సాధించిన కలెక్షన్లు మరో ఎత్తు.

నాని ఉన్న ఊపులో.. ‘నిన్ను కోరి’ లాంటి క్లాస్ లవ్ స్టోరీని తెలుగు ఎన్నారై ప్రేక్షకులు బాగా ఆదరిస్తారని అంచనా వేశారు కానీ.. ఆ అంచనాల్ని మించిపోయి అక్కడ కళ్లు చెదిరే వసూళ్లు రాబట్టిందీ సినిమా. ఫస్ట్ వీకెండ్లోనే 8 లక్షల డాలర్లకు పైగా ‘నిన్ను కోరి’ కొల్లగొట్టడం విశేషం. అంటే అక్కడే రూ.5 కోట్లకు పైగా గ్రాస్ వసూళ్లు వచ్చేశాయన్నమాట ఈ చిత్రానికి. గురువారం ప్రిమియర్లతో 1.6 లక్షల డాలర్లు వసూలు చేసిన ‘నిన్ను కోరి’.. శుక్రవారం 2.25 లక్షల డాలర్లు.. శనివారం 2.75 లక్షల డాలర్లు.. ఆదివారం 1.45 లక్షల డాలర్లతో అదరగొట్టింది. వీకెండ్ అయ్యేసరికే 8 లక్షల డాలర్లు కొల్లగొట్టిన ఈ చిత్రం సెకండ్ వీకెండ్ కంటే ముందే మిలియన్ డాలర్ మార్కును అందుకోవడం గ్యారెంటీ. రెండో వీకెండ్లో కూడా మంచి వసూళ్లు వచ్చే అవకాశముంది కాబట్టి ఫుల్ రన్లో 1.5 మిలియన్ మార్కుకు కూడా చేరువగా రావొచ్చేమో.