అంతా నానినే మోస్తే ఎలా?

న్యాచురల్ స్టార్ నాని గ్యాంగ్ లీడర్ ఇంకో మూడు రోజుల్లో థియేటర్లలో అడుగు పెట్టనుంది. సాహో తర్వాత బాక్స్ ఆఫీస్ కు రెండు వారాల గ్యాప్ వచ్చింది. రెవిన్యూ తగ్గిపోయి హాళ్లు వెలవెలబోతున్నాయి. సాహో కనక బ్లాక్ బస్టర్ టాక్ తెచ్చుకుని ఉంటే ఎలాంటి ఇబ్బంది ఉండేది కాదు కానీ ఇప్పుడా పరిస్థితి లేదు. అందుకే గ్యాంగ్ లీడర్ తో మళ్ళీ ఊపురావాలని ట్రేడ్ కోరుకుంటోంది. కానీ వాస్తవ పరిస్థితి దానికి భిన్నంగా ఉంది.

ఆశించిన స్థాయిలో విపరీతమైన బజ్ అయితే నాని గ్యాంగ్ లీడర్ మీద లేదు. అంచనాలు ఉన్నాయి కానీ భారీ ఓపెనింగ్స్ గా అవి మారేంత స్థాయిలో పబ్లిసిటీ చేయకపోవడం కొంత మైనస్ గా నిలుస్తోంది. అయితే ప్రమోషన్ మొత్తం నాని తన భుజాల మీద వేసుకుని అంతా తానై వ్యవహరించడం ఇప్పుడు హాట్ టాపిక్ గా మారింది. దర్శకుడు విక్రమ్ కుమార్ ఎక్కడా కనిపించడం లేదు. మీడియా ఇంటర్వ్యూలు సైతం పెద్దగా ఇవ్వడం లేదు.

మరోవైపు యూత్ లో మంచి గుర్తింపు ఉన్న హీరో కార్తికేయ ఇందులో నెగటివ్ షేడ్స్ ఉన్న రోల్ ని ఫస్ట్ టైం చేస్తే తాను బయటికి వచ్చి ప్రమోట్ చేసే బాధ్యతను తీసుకోవడం లేదు. ప్రియాంకా అరుళ్ మోహన్ ని పరిచయం చేస్తున్నా అసలు ఇందులో హీరోయిన్ ఉందా లేదా అని అనుమానం వచ్చేలా తనను ఎక్కువ బయటికి తీసుకురావడం లేదు. ఎక్కడ చూసినా నానినే కనిపిస్తున్నాడు. ఇక మిగిలిన లేడీ గ్యాంగ్ ఎక్కడైనా కనిపిస్తే ఒట్టు. ఇలా అందరిని ఓవర్ షాడో చేసి నాని ఒక్కటే ప్రమోషన్ చేయడం చూస్తే ఏవో అనుమానాలు రాకమానవు. అవి తీరాలంటే శుక్రవారం దాకా వెయిట్ చేయాల్సిందే