నాని 'శ్రద్ధ' వహించింది అందుకేనా ?

న్యాచురల్ స్టార్ నాని జెర్సీ ఇంకో మూడు వారాల్లో థియేటర్లలో అడుగు పెడుతుంది. క్రికెటర్ గా మొదటిసారి నటిస్తుండటంతో దీని మీద అంచనాలు బాగానే ఉన్నాయి. అయితే హీరోయిన్ గా పరిచయమవుతున్న శ్రద్ధ శ్రీనాథ్ గురించి అభిమానుల్లో కొంత అనుమానం లేకపోలేదు. ఎందుకంటే తను గ్లామర్ ఒలకబోసే టైపు కాదు. చాలా సెలెక్టివ్ గా పాత్ర నచ్చి పెర్ఫార్మన్స్ కు స్కోప్ ఉంటుంది అంటేనే చేస్తుంది.

కన్నడ యుటర్న్ పెద్ద బ్రేక్ ఇచ్చాక విక్రమ్ వేదాలో కూడా మంచి పేరు వచ్చింది. ఇప్పుడు చేస్తున్న తమిళ పింక్ లో రేప్ బాధితురాలిగా ఛాలెంజింగ్ రోల్ చేస్తోంది. ఇవి కాకుండా మరికొన్ని కన్నడ ప్రాజెక్ట్స్ చేతిలో ఉన్నాయి. అలాంటి అమ్మాయి నాని సరసన అన్నప్పుడు సందేహాలు రావడం సహజం. దానికి కారణం లేకపోలేదు

మార్కెట్ లో బలమైన ఇమేజ్ వచ్చాక నాని క్రేజ్ ఉన్న హీరోయిన్లతోనే చేస్తున్నాడు.గత చిత్రం దేవదాస్ లో డిమాండ్ ఉన్న రష్మిక మందన్నను ఏరికోరి తీసుకొచ్చారు. అంతకు ముందు అనుపమ పరమేశ్వరన్ నివేదా థామస్ కీర్తి సురేష్ అందరూ యూత్ లో ఫాలోయింగ్ ఉన్నవాళ్లే. కానీ శ్రద్ధ వేరు.

విశ్వసనీయ సమాచారం మేరకు జెర్సి అధిక భాగం చాలా సీరియస్ గా స్పోర్ట్స్ బ్యాక్ డ్రాప్ లో సాగుతుంది. నానికి శ్రద్ధతో కంటే కోచ్ గా నటించిన సత్యరాజ్ తోనే ఎక్కువ సన్నివేశాలు ఉంటాయట. అంటే కేవలం ఓ లవ్ ట్రాక్ కోసం తప్ప శ్రద్ధకు అంత మించి ఇంపార్టెన్స్ లేదని తెలిసింది. ఈ కారణం వల్లే అంతకు ముందు ఇద్దరు ముగ్గురు నో చెప్పారని టాక్. ఏదైతేనేం నాని శ్రద్ధ వహించడానికి కారణం తెలిసిందిగా