జై బాలయ్య.. అదే కాపీ కొట్టారా?

ఇప్పుడు మన హీరో నాని 'జై బాలయ్య' టాటూ ఎందుకు వేసుకున్నట్లు అంటే.. ఒక సరికొత్త టాక్‌ ఒకటి వినిపిస్తోంది. అసలు జై బాలయ్య అనే టాటూ వేయించుకోవడం వెనుక ఏదైనా కొత్త కథ ఉందా? అసలు కథకూ ఆ బాలయ్య ట్యాటూ కి సంబంధం ఏదైనా ఉందా? ఆ పేరు చెట్టూ కథ తిరుగుతుందా? వీటికి నాని చెప్పిన ఆన్సర్లే షాకింగ్‌.

''నా చేతి మీద జై బాలయ్య టాటూ చూసి అందరూ అదే సినిమా పేరని అనుకున్నారు. అయితే అది కేవలం హీరో క్యారెక్టరైజేషన్‌ మాత్రమే. అస్సలు కథకు ఏ మాత్రం సంబంధం లేదు'' అంటూ చెప్పుకొచ్చాడు నాని. దీని బట్టి చూస్తే మనోళ్ళు కన్నడ సినిమా ''మిష్టర్‌ అండ్‌ మిసెస్‌ రామాచారి'' నుండి కాస్త ప్రేరణ పొందారనే అనుకోవాలి. ఆ సినిమాలో హీరో యష్‌.. దివంగత సూపర్‌ స్టార్‌ విష్ణువర్దన్‌ కు వీరాభిమాని. అందుకే విష్ణువర్దన్‌ సినిమా అయిన 'నాగరహావు'లో హీరో పేరైన 'రామాచారి' అనే పేరును తన చెస్ట్‌ పై టాటూ వేయించుకుంటాడు. ఇక హీరోయిన్‌ రాధికా పండిట్‌ పేరు సినిమాలో దివ్య అయినప్పటికీ మనోడు ఆమెను 'మార్గరెట్‌' అంటూ పిలుస్తాడు. ఎందుకంటే 'నాగరహావు' సినిమాలో హీరోయిన్‌ పేరు అదే. చూస్తుంటే ఇప్పుడు నాని కూడా అలాగే బాలయ్య టాటూ వేయించుకుని.. అలా అలా ఏదైనా లింకింగ్‌ చేస్తాడేమో అనే సందేహం వస్తోంది.

సర్లేండి. రెండు రోజుల్లో ఆ విషయం తెలుస్తుందిగా. ఈ శుక్రవారమే ''కృష్ణగాడి వీర ప్రేమ గాధ'' రిలీజ్‌.