అ.. అప్పుడు కాదు మాష్టారూ!!

వరస హిట్లతో జోరుమీదున్న నాచురల్ స్టార్ నాని కెరీర్ లో గేరు మార్చాడు. ఓవైపు చకచకా సినిమాలు పూర్తి చేస్తూనే మరోవైపు సొంతంగా సినిమా ప్రొడక్షన్ మొదలెట్టాడు. కొత్త దర్శకుడు ప్రశాంత్ వర్మ చెప్పిన ఓ డిఫరెంట్ కథ నచ్చడంతో అ! సినిమాకు శ్రీకారం చుట్టాడు. తాను నటించకపోయినా సొంతంగా తీయడానికి ముందుకొచ్చాడు. ఓవైపు కృష్ణార్జున యుద్ధం మూవీ షూటింగ్ చేస్తూనే అ! సినిమా ప్రొడక్షన్ పనులు చూసుకున్నాడు.

అ! సినిమా షూటింగ్ ఇప్పటికే దాదాపుగా పూర్తయింది. ప్రమోషన్ పనులు కూడా ముందే మొదలుపెట్టేశారు. ముందుకు అనుకున్న ప్రకారమైతే ఈ సినిమా ఫిబ్రవరి మొదటివారంలో థియేటర్లకు రావాల్సి ఉంది. దీనిని పోస్ట్ పోన్ చేయాలనే ఆలోచనలో నిర్మాత నానితోపాటు సినిమా యూనిట్ ఉంది. ఎందుకంటే ఫిబ్రవరిలో చాలా సినిమాలు రిలీజుకు రెడీగా ఉన్నాయి. వరుణ్ తేజ్ తొలిప్రేమ.. సాయిధరమ్ తేజ్ ఇంటలిజెంట్.. మోహన్ బాబు గాయత్రి.. నిఖిల్ కిర్రాక్ పార్టీ సినిమాలు ఫిబ్రవరి మొదట్లోనే రిలీజవుతున్నాయి. ఇంతపోటీ మధ్య అ! సినిమా దింపడం వల్ల ఆశించిన కలెక్షన్లు రావనే ఉద్దేశంతో రిలీజ్ ను పోస్ట్ పోన్ చేయడమే మంచిదని నాని అండ్ టీం భావిస్తోంది. కొత్త డేట్ ఫిక్సయ్యే వరకు ప్రమోషన్లకు కాస్త గ్యాప్ ఇచ్చారు.

అ! సినిమా మీడియం బడ్జెట్ లో తెరకెక్కినా స్టార్ కాస్టింగ్ భారీగానే ఉంది. వాల్ పోస్టర్ బ్యానర్ పై వస్తున్న ఈ మూవీలో హీరోయిన్లు కాజల్ అగర్వాల్.. నిత్య మీనన్.. రెజీనా కెసాండ్రా.. ఈషాతో పాటు అవసరాల శ్రీనివాస్.. ప్రయదర్శి తదితరలు నటిస్తున్నారు. ఇందులో మాస్ మహరాజా రవితేజ ఓ మొక్కకు.. నాని చేపకు వాయిస్ ఓవర్ అందించడం విశేషం.