నాని రేటు, ఫేటు మారిపోయాయోచ్

నేచురల్ స్టార్ నాని ఇప్పుడు ఒక్కో సినిమాకి ఎంత తీసుకుంటున్నాడో తెలుసా.. ? భలే భలే మగాడివోయ్ కి ముందయితే.. నాని పారితోషికం గట్టిగా యాభై లక్షలు కూడా లేదు. కనీసం మీడియం రేంజ్ హీరో అనిపించుకోవడం కూడా కష్టమే అనిపించేది. ఇంకా చెప్పాలంటే.. ఈగ సినిమా లేకపోతే ఇంతగా గుర్తు పెట్టుకోవడం కూడా కష్టమేమో అనిపించేది. ఇక చాలాకాలం పాటు బాక్సుల్లో మూలిగిన పైసా తర్వాత.. ఇక నాని పని అయిపోయినట్లే అనుకున్నారు.

ఆ తర్వాత కూడా కలిసొచ్చిందేమీ లేదు. కొత్త హీరోలు కూడా కుమ్మేస్తున్న వేళ.. ఇక నానిని మర్చిపోవడమే అని అందరూ భావించారు. కానీ ఒకే ఒక్క మతిమరుపు కేరక్టర్ తో నాని రేటు ఫేట్ మారిపోయాయి. ఇప్పుడు ఒక్కో సినిమాకు నాలుగు కోట్ల రూపాయలు తీసుకుంటున్నాడు నాని. అంటే ఒక్క సినిమాతోనే ఇతగాడి రేటు పది రెట్లు పెరిగిందన్న మాట. భలేభలే మగాడివోయ్ కి వచ్చిన కలెక్షన్స్ తో పోల్చితే.. ఇదేమంత ఎక్కువ కాదంటున్నారు ఇండస్ట్రీ జనాలు. అయితే.. గతంలో ఈ నాలుగు కోట్లతో దాదాపుగా నాని సినిమాలు రెండు తయారైపోయేవి. ఇప్పుడు తనొక్కడే నాలుగు కోట్లు తీసుకునే రేంజ్ కు ఎదిగాడు.

అంతగా భలేభలే మగాడివోయ్ ఇచ్చిన సక్సెస్ జోష్ అయినా.. ఇందులో నాని కష్టం కూడా చాలా ఉందనే మాట మర్చిపోకూడదు. ప్రస్తుతం జై బాలయ్య అంటూ పచ్చ పొడిపించుకున్న ఓ అభిమానిగా.. క్యూట్ లవ్ స్టోరీలో కనిపించనున్నాడు నాని. ఈ చిత్రం షూటింగ్ దాదాపు పూర్తి కాగా.. ఫిబ్రవరిలో రిలీజ్ చేయాలని డైరెక్టర్ హను రాఘవపూడి ఆలోచిస్తున్నాడు.