నాని ఏకంగా రజనీనే సెట్ చేయాలనుకుంటున్నాడే!

రజనీకాంత్ కి అభిమానులు కానివారు ఎవరు ఉంటారు? అప్పటివరకూ తమిళ తెరపై వస్తున్న కథలను ఒక్కసారిగా మలుపు తిప్పేసిన ఘనత ఆయన చరిత్రలో కనిపిస్తుంది. తెరపై హీరోయిజాన్ని ఇలా కూడా చూపించవచ్చునా? అని మిగతా హీరోలను ఆశ్చర్యపరిచిన స్టైల్ ఆయన సొంతం.

మిగతా హీరోలు తెరపై ఏదైనా ఒక సాహసం చేస్తే, దాని సాధ్యాసాధ్యాలను గురించి ప్రేక్షకులు ఆలోచన చేస్తారు. అది అసాధ్యంగా అనిపిస్తే నవ్వుకుంటారు. కానీ రజనీ విషయంలో మాత్రం అలా జరగదు .. తెరపై ఆయనకి సాధ్యం కానిది లేదు .. ఆయన ఏం చేసినా అది ఆయన వల్ల అవుతుందనే నమ్ముతారు .. అదే ఆయన ప్రత్యేకత.

అలాంటి రజనీకాంత్ తో సినిమాలు చేయడానికి ఎంతో మంది దర్శకులు వెయిట్ చేస్తుంటారు. ఆ అవకాశాన్ని దక్కించుకున్నవారు అదృష్టవంతులుగా చూడబడుతుంటారు.

అందువలన అలాంటి రజనీ కోసం కథ రెడీ చేసుకుని ఎప్పుడు అవకాశం దక్కుతుందా అని ఎంతో కాలంగా ఎదురు చూస్తున్నవారు ఎంతోమంది ఉంటారు. 'ఆయన ఈ రోజున ఓకే చెప్పాలేగానీ .. రేపే సినిమాను ఎనౌన్స్ చేస్తా' అనే డైరెక్టర్లు చాలామందినే కనిపిస్తారు. కానీ ఆ మాట ఒక యంగ్ హీరో అంటే ఆశ్చర్యం కలగదూ. ఇంతకు ఆ హీరో ఎవరనేగా మీ డౌటు .. ఇంకెవరూ మన నానీనే.

'శ్యామ్ సింగ రాయ్' సినిమా ప్రమోషన్స్ లో భాగంగా కోలీవుడ్ మీడియాతో మాట్లాడుతూ నాని ఈ మాట అన్నాడు. సాధారణంగా హీరోలు ఎవరైనా .. రజనీతో కలిసి నటించాలని ఉందని అంటారు. కానీ నాని మాత్రం అందుకు భిన్నంగా రజనీని డైరెక్ట్ చేస్తానని చెప్పాడు.

అలా చెప్పడానికి ఆయనకి రజనీ పట్ల ఉన్న అభిమానం ఒక కారణమైతే, డైరెక్షన్ డిపార్టుమెంటులో పని చేసిన అనుభవం ఉండటం మరో కారణం. రజనీకాంత్ స్టైల్ .. ఆయన డైలాగ్స్ చెప్పే తీరు అంటే తనకి ఎంతో ఇష్టమని చెప్పిన నాని, ఆయన చేసిన సినిమాల్లో తనకి 'పడయప్పా' (నరసింహా) అంటే చాలా ఇష్టమని అన్నాడు.

అంతేకాదు శివాజీ .. నరసింహా సినిమాల్లోని డైలాగ్స్ ను చెప్పాడు. అలా మొత్తంగా ఆయన కోలీవుడ్ మీడియాను ఆకట్టుకునే ప్రయత్నం చేశాడు. రజనీని అభిమానించే వారిని తమిళ ప్రేక్షకులు తమవాడిని చేసుకుంటారు .. తమ గుంపులో కలిపేసుకుంటారు. అందువలన నాని 'శ్యామ్ సింగ రాయ్' దాదాపు అక్కడి ప్రేక్షకులకు చాలా దగ్గరగా వెళ్లిపోయినట్టే.

రాహుల్ సాంకృత్యన్ దర్శకత్వం వహించిన ఈ సినిమా ఈ నెల 24వ తేదీన విడుదల కానుంది. ఈ సినిమాలో నాని సరసన నాయికలుగా సాయిపల్లవి .. కృతి శెట్టి .. మడోన్నా అలరించనుండటం విశేషం.