త్రివిక్ర‌మ్ అండ్ నాని.. వాట్స్ అప్?

అజ్ఞాత‌వాసి ఫ్లాప్‌ తో త్రివిక్ర‌మ్ అంటే భ‌య‌ప‌డే హీరోల సంఖ్య పెరిగిపోతుంద‌నుకున్నారు సినీజ‌నాలు. అదేమీ జ‌ర‌గ‌లేదు. సినిమాల‌న్నాక హిట్లు ఫ్లాపులు స‌హ‌జ‌మే అని తేలిగ్గా తీసుకున్న‌ట్టు ఉన్నారు టాలీవుడ్ హీరోలు. అందుకే త్రివిక్ర‌మ్‌ తో న‌టించేందుకు సిద్ధ‌మైపోతున్నారు. త్వ‌ర‌లో జూనియ‌ర్ ఎన్టీఆర్ సినిమా సెట్స్ మీద‌కి వెళ్ల‌బోతోంది. ఆ త‌రువాత త్రివిక్ర‌మ్ నాని జ‌ట్టు క‌ట్ట‌బోతున్న‌ట్టు తెలుస్తోంది.

నాని ప్ర‌స్తుతం కృష్ణార్జున యుద్ధంలో న‌టిస్తున్నాడు. ఆ సినిమాలో ద్విపాత్రాభిన‌యం చేస్తున్నాడు. మేర్లపాక గాంధీ ఈ సినిమా ద‌ర్శ‌కుడు. ఆ త‌రువాత నాని త్రివిక్ర‌మ్‌తో సినిమా చేసే అవ‌కాశాలు క‌నిపిస్తున్నాయి. వీరిద్ద‌రూ క‌లిసి మంచి కుటుంబ‌క‌థాచిత్రం తీయాల‌ని భావిస్తున్న‌ట్టు స‌మాచారం. అత్తారింటికి దారేది లాంటి మంచి కుటుంబ‌చిత్రాన్ని అందించి త్రివిక్ర‌మ్‌... అలాంటి మ‌రో మంచి స్క్రిప్టును నానీ కోసం కూడా రెడీ చేయ‌నున్నాడ‌ని స‌న్నిహితులు చెబుతున్నారు. ఇక నానీ గురించి చెప్ప‌క్క‌ర్లేదు ఫ్యామిలీ ఎంట‌ర్ టైన్ మెంట్ సినిమాల‌లో చించేసేలా న‌టించేస్తాడు. సో వీరిద్ద‌రి కాంబినేష‌న్‌ లో సినిమా అంటే క్రేజ్ దానంత‌ట అదే వ‌చ్చేస్తుంది.

ఈ ఏడాది త్రివిక్ర‌మ్‌... నాని వారి వారి ప్రాజెక్టుల‌లో బిజీగా ఉన్నారు. వారిద్ద‌రూ జ‌త‌క‌ట్ట‌డం ఈ ఏడాది క‌ష్టమే. క‌నుక 2019లో వీరి సినిమా మొద‌ల‌య్యే అవ‌కాశం ఉంది. నాని ఇంత‌వ‌ర‌కు ఒక్క సినిమా కూడా త్రివిక్ర‌మ్ ద‌ర్శ‌కత్వంలో చేయ‌లేదు. నానీ కొత్త డైరెక్ట‌ర్ల‌కే ఎక్కువ ఛాన్సులు ఇచ్చాడు. ఆ సినిమాలు కూడా బాగానే హిట్ కొట్టాయి. వ‌చ్చే ఏడాది త్రివిక్ర‌మ్ లాంటి అనుభ‌వ శీలితో ప‌నిచేయ‌బోతున్నాడట నాని.