భల్లాల రథం మజ్ను అందుకే ఎక్కాడా...

నేచురల్ స్టార్ నాని నటించిన కొత్త సినిమా రిలీజ్ కి రెడీ అయిపోయింది. ముందుగా అనుకున్న ప్రకారం అయితే సెప్టెంబర్ 16నే థియేటర్లలోకి వచ్చేయాలి కానీ.. మజ్నుని సెప్టెంబర్ 22న విడుదల చేస్తామని మేకర్స్ ఇప్పటికే చెప్పేశారు. సినిమాపై ఆసక్తి పెంచేందుకు రకరకాల టెక్నిక్స్ ఉపయోగిస్తోంది మజ్ను టీం. ముఖ్యంగా ట్రైలర్ ప్రారంభంలోనే నాని ఓ రథంపై రయ్యిమని వచ్చేస్తూ ఉంటాడు.

బాహుబలి మూవీ క్లైమాక్స్ లో భల్లాలదేవుడు వాడిన కత్తుల రథం గుర్తుంది కదా.. ఆ రథాన్ని నాని నడుపుతున్నాడు. మరి భల్లాలదేవుడి రథం.. నాని దగ్గరకు ఎందుకొచ్చిందబ్బా అని ఆలోచిస్తే.. మజ్ను మూవీలో నాని అసిస్టెంట్ డైరెక్టర్ గా నటిస్తున్నాడని.. ఈ చిత్రంలో రాజమౌళి కూడా గెస్ట్ రోల్ చేస్తున్నాడనే విషయాన్ని గుర్తు చేసుకోవాలి. భల్లాలదేవుడి రధం.. అసిస్టెంట్ డైరెక్టర్ నాని డ్రైవింగ్.. రాజమౌళి గెస్ట్ రోల్.. అన్నీ మిక్స్ చేస్తే.. ఓ క్లారిటీ వచ్చేస్తుంది.

మజ్ను మూవీలో అసిస్టెంట్ డైరెక్టర్ గా పని చేసే నాని.. రాజమౌళికి సహాయకుడిగా.. బాహుబలి మూవీకోసం పని చేస్తున్నాడన్న మాట. ఏదో అవసరం వచ్చి.. షూటింగ్ స్పాట్ లో దగ్గరే ఉన్న రథాన్ని తీసుకుని వెళ్లిపోయే సీన్ ఇది. బాహుబలిలో నాని రోల్ ఏంటో..మీకు క్లారిటీ వచ్చేసి ఉంటుంది కదా..