ఫ్లాప్ డైరెక్టర్ కు నాని అవకాశం ఇస్తాడా?

పలు సక్సెస్ఫుల్ సినిమాలకు కథ అందించిన వక్కంతం వంశీ టాలీవుడ్ లో స్టార్ రైటర్ గానే కొనసాగాడు. 'కిక్'.. 'రేస్ గుర్రం'.. 'టెంపర్' లాంటి సినిమాలతో రచయితగా తనకంటూ ప్రత్యేకమైన పంథా ఏర్పరుచుకున్నాడు. అయితే రచయితలు దర్శకులుగా మారే ట్రెండ్ ను కొనసాగిస్తూ మెగాఫోన్ పట్టుకున్నాడు. స్టైలిష్ స్టార్ అల్లు అర్జున్ తో 'నాపేరు సూర్య నా ఇల్లు ఇండియా' చిత్రాన్ని తెరకెక్కించాడు. అయితే ఆ సినిమా బాక్స్ ఆఫీస్ వద్ద తీవ్రంగా నిరాశపరచడంతో డైరెక్టర్ గా కొనసాగాలనే కలలకు గండికొట్టింది.

'నా పేరు సూర్య' రిలీజ్ అయి ఇప్పటికి దాదాపు గా ఏడాది దాటింది. ఇప్పుడు మళ్ళీ తన రెండో సినిమా ప్రయత్నాలలో వార్తల్లోకి వచ్చాడు వక్కంతం వంశీ. ఈమధ్యే న్యాచురల్ స్టార్ నానిని కలిసి ఒక కథను వినిపించాడట. అయితే ఇంకా నాని నుంచి గ్రీన్ సిగ్నల్ రాలేదని సమాచారం. మరి ఎలాంటి కథ వినిపించాడు.. ఏ జోనర్ లో సినిమా ఉంటుంది అనేది ఇంకా తెలియదు కానీ వక్కంతం మాత్రం నాని గ్రీన్ సిగ్నల్ ఇస్తాడని కాన్ఫిడెంట్ గా ఉన్నాడట.

నాని ప్రస్తుతం రెండు సినిమాల్లో నటిస్తున్నాడు. ఒకటి విక్రమ్ కుమార్ దర్శకత్వంలో తెరకెక్కుతున్న 'గ్యాంగ్ లీడర్' మరొకటి ఇంద్రంగంటి మోహన కృష్ణ దర్శకత్వంలో తెరకెక్కుతున్న అన్ టైటిల్డ్ ఫిలిం. మరి ఈ సినిమాల తర్వాత చేసే సినిమా కోసం వక్కంతం వంశీకి గ్రీన్ సిగ్నల్ ఇస్తాడా లేదా అనేది త్వరలోనే తెలిసే అవకాశం ఉంది.