నాగ్ దర్శకుడు నానితో..

వరస హిట్లతో దూసుకుపోతున్న నాచురల్ స్టార్ నాని క్రేజ్ రోజురోజుకు పెరుగుతోంది. నిన్న.. మొన్నటిదాకా చిన్న డైరెక్టర్లు.. నిర్మాతలతో సినిమాలు చేసిన నానికి ఇప్పుడు వరసపెట్టి భారీ ప్రాజెక్టులు చేస్తున్నాడు. ప్రస్తుతం వెంకటాద్రి ఎక్స్ ప్రెస్ ఫేం డైరెక్టర్ మేర్లపాక గాంధీ దర్శకత్వంలో కృష్టార్జున యుద్ధం సినిమా చేస్తున్నాడు. దీనిలో తన కెరీర్ లో రెండోసారి ద్విపాత్రాభినయం చేస్తున్నాడు.

కృష్ణార్జున యుద్ధం సినిమా ఇంకా షూటింగ్ లో ఉండగానే నాని నాగార్జునతో కలిసి నటించే మల్టీ స్టారర్ సినిమాలో నటించేందుకు పచ్చజెండా ఊపాడు. దీంతోపాటు సినిమా తీసేందుకు వైవిధ్యమైన చిత్రాలు తీసే దర్శకుడిగా పేరున్న విక్రమ్ కె.కుమార్ నానితో సినిమా తీసేందుకు రెడీ అయిపోయాడు. నాగార్జున కుటుంబానికి మనం లాంటి మరిచిపోలేని సినిమాను ఇచ్చిన విక్రమ్ ఆ తరవాత నాగ్ కోరిక మేరకు అఖిల్ ను హీరోగా నిలబెట్టే బాధ్యత తలకెత్తుకున్నాడు. ఆ బాధ్యత పూర్తి చేయడంతో ఇప్పుడు తరవాత సినిమా నానితో తీసేందుకు సిద్ధమవుతున్నాడు. ఇప్పటికే విక్రమ్ అతడిని కలిసి స్టోరీ సబ్జెక్టు కూడా చెప్పాడని తెలుస్తోంది.

విక్రమ్ కె.కుమార్ ప్రతిసారీ ప్రేక్షకులను ఆశ్చర్యపరిచే ఓ కొత్త అంశంతో సినిమా తీస్తుంటాడు. ఈసారి కూడా అదేవిధంగా ఓ వైవిధ్యభరితమైన కథతో సిద్ధమయ్యాడని నాని సన్నిహితులు చెబుతున్నారు. ప్రస్తుతం విక్రమ్ కథకు తుది మెరుగులు దిద్దే పనిలో ఉన్నాడు. ఈలోగా నాని తనకున్న కమిట్ మెంట్స్ లో కొన్ని పూర్తి చేసుకుని విక్రమ్ సినిమాకు సమయం కేటాయించే అవకాశం ఉంటుంది.