కథానాయకుడు ఆడియోకు 'ఆయన' రావడం లేదా..?

మీకు 2014 ఎన్నికల సిత్రాలు గుర్తున్నాయా. అల్లరి ఫేమ్‌ రవిబాబు తీసిన టీడీపీ యాడ్స్‌ అప్పట్లో సన్షేషన్‌ క్రియేట్‌ చేశాయి. అందులో “ఆయన” మళ్లీ రావాలి అంటూ చంద్రబాబుని పేర్కొంటూ యాడ్స్‌ తీశారు. అవన్నీ సాధారణ ప్రజానీకాన్ని బాగానే ఆకట్టుకున్నాయి. ఇప్పుడు మరోసారి ఆయన ప్రస్తావన ఎందుకు అంటే.. కథానాయకుడు సినిమా ఆడియోకు ఆయన రావడం లేదంట మరి.

ఎన్టీఆర్ బయోపిక్‌ ని కష్టాలకు ఓర్చి ఎలాగొలా పూర్తి చేశారు బాలయ్య. ఇప్పుడు సినిమా రిలీజ్‌ కు దగ్గరపడడంతో.. శుక్రవారం ఆడియో ఫంక్షన్‌ ని గ్రాండ్‌ గా ప్లాన్‌ చేశారు. ఆ ఆడియో కార్యక్రమానికి ఎన్టీఆర్ కుటుంబ సభ్యులతో పాటు.. ఇండస్ట్రీలో ఉన్న ఆయన అభిమానుల్ని ఒకే వేదికపైకి తీసుకురాబోతున్నారు. జూనియర్‌ ఎన్టీఆర్‌ కు కూడా బాలయ్య స్వయంగా ఫోన్‌ చేసి మరీ ఫంక్షన్‌ కి రమ్మని పిలిచాడు. అందరూ వస్తున్నారు కానీ చంద్రబాబు - ఆయన తనయుడు లోకేష్‌ మాత్రం ఈ కార్యక్రమానికి మిస్‌ అవుతున్నారని సమాచారం.

కథానాయకుడు ఆడియో ఫంక్షన్‌ ని చరిత్రలో నిలిచిపోయేలా ప్లాన్‌ చేస్తున్నాడు బాలయ్య. దగ్గబాటి పురంధేశ్వరి - ఆమె భర్త వెంకటేశ్వరరావు - అల్లుళ్లు - కూతుళ్లు ఇలా అందరూ ఈ వేడుకకు వస్తున్నారు. చంద్రబాబు భార్య భువనేశ్వరి - కోడలు బ్రాహ్మణి కూడా వస్తున్నారు. కానీ చంద్రబాబు అండ్‌ సన్‌ మాత్రం రావడం లేదని టాక్‌. రీసెంట్‌ గా కోస్తా తీరాన్ని పెథాయ్‌ తుపాను అతలాకుతలం చేసింది. దీంతో.. ప్రస్తుతం ఇద్దరూ ఆ పనుల్లో బిజీగా ఉన్నారని.. అందుకే రావడం కుదరడం లేదని ఆయన అనుకూల వర్గాలు చెప్తున్నాయి. మరోవైపు.. వేదికపై ఎన్టీఆర్‌ కుటుంబ సభ్యులంతా ఉంటారు కాబట్టి.. అలాంటి చోటకు వస్తే ఇబ్బందికర పరిస్థితులు ఎదుర్కోవాల్సి వస్తుందని.. అందుకే కార్యక్రమానికి చంద్రబాబు అండ్ లోకేష్‌ ఇద్దరూ డుమ్మా కొట్టబోతున్నారని వార్తలు వస్తున్నాయి.