నారా పుత్ర‌కు న‌చ్చిన గౌత‌మీ పుత్ర‌!

ఈ ద‌స‌రా పండుగ రోజు నంద‌మూరి బాల‌కృష్ణ అభిమానుల‌కు డ‌బుల్ ఆనందాన్ని ఇచ్చింది! ఎప్ప‌టి నుంచో ఎదురుచూస్తున్న ‘గౌత‌మీపుత్ర శాత‌క‌ర్ణి సినిమా’ టీజ‌ర్ విడుద‌లైంది. ఆ చిత్రంలో బాల‌య్య గెట‌ప్స్ కూడా విడుద‌ల చేశారు. యూట్యూబ్ లో విడుద‌లైన ట్రైల‌ర్ అంద‌రినీ విశేషంగా అల‌రిస్తోంది. దీంతో బాలయ్య అభిమానులు దిల్ ఖుష్ అయ్యారు. ఇంకోప‌క్క‌, తెలుగుదేశం కార్య‌క‌ర్త‌లు కూడా బాల‌య్య గెట‌ప్ చూసి మురిసిపోతున్నారు. త‌మ నాయకుడు అదిరిపోయాడంటూ సోష‌ల్ మీడియాలో కామెంట్లు పెడుతూ పులికించిపోతున్నారు. ఈ నేప‌థ్యంలో నంద‌మూరి బాల‌కృష్ణ అల్లుడు, ముఖ్య‌మంత్రి నారా చంద్ర‌బాబు నాయుడు కుమారుడు, తెలుగుదేశం పార్టీ జాతీయ కార్య‌ద‌ర్శి నారా లోకేష్ స్పందించారు. మామ‌య్య గెట‌ప్ మీద ప్ర‌త్యేకంగా ట్వీట్ చేశారు.

‘గౌత‌మీ పుత్ర శాత‌క‌ర్ణిలో మామ‌య్య‌ను ఆ గెట‌ప్ లో చూస్తుంటే రోమాలు నిక్క‌పొడుచుకుంటున్నాయ‌’ని లోకేష్ ట్వీట్ చేశారు. ‘ఆ దృశ్య కావ్యం ఎప్పుడెప్పుడు వ‌స్తుందా అని ఎదురుచూస్తున్నాన‌నీ, ఈ అద్భుతాన్ని తెర‌మీద చేసేంత‌వ‌ర‌కూ తాను ఆగ‌లేక‌పోతున్నాన‌’ని ఉబ్బిత‌బ్బిబ్బైపోయారు లోకేష్‌. మొత్తానికి, మామ గెట‌ప్ అల్లుడికి బాగా న‌చ్చేసింద‌న్న‌మాట‌. బాలయ్య గెట‌ప్ అదిరిపోయింద‌ని అభిమానులే ఉప్పొంగిపోతున్నారు, అలాంటిది సొంత అల్లుడు లోకేష్ కి ఈ గెట‌ప్ ఇంత‌గా న‌చ్చిందన్న విష‌యం బాల‌య్య‌కు తెలిస్తే ఆయ‌న ఇంకెంత పొంగిపోతారో! చారిత్ర‌క నేప‌థ్యం ఉన్న క‌థాంశంతో రూపొందుతున్న ఈ చిత్రానికి ద‌ర్శ‌కుడు క్రిష్‌. అమ‌రావ‌తిని ఒక‌ప్పుడు ప‌రిపాలించిన గౌత‌మీపుత్ర శాత‌క‌ర్ణి జీవిత క‌థే ఈ చిత్రం. బాల‌య్య సినిమా కెరీర్‌తోపాటు రాజ‌కీయప‌రంగానూ ఈ చిత్రం ఎంతో మైలేజ్ ఇస్తుంద‌ని నంద‌మూరి అభిమానులు ఆశిస్తున్నారు. మామ‌య్య‌ను గౌత‌మీపుత్ర‌గా చూడాల‌ని ఆశ‌ప‌డుతున్న అల్లుడు నారా పుత్ర కూడా సంక్రాంతి వ‌ర‌కూ ఆగాల్సిందే మ‌రి!

Like Us on Facebook : https://www.facebook.com/Tupakidotcom/