అదరగొడుతున్న అసురుడు

ఎప్పట్నుంచో ఊరిస్తున్న కమర్షియల్‌ సక్సెస్‌ ఎట్టకేలకు నారా రోహిత్‌ సొంతమైంది. ఆయన కథానాయకుడిగా నటించిన 'అసుర' అన్ని రకాలుగానూ అదరగొడుతోంది. యాక్షన్‌ థ్రిల్లర్‌గా ప్రేక్షకుల ముందుకొచ్చిన ఈ చిత్రాన్ని అటు ప్రేక్షకులు, ఇటు విమర్శకులు ఆకాశానికెత్తేస్తున్నారు. దీంతో వసూళ్లు హోరెత్తుతున్నాయి. బోలెడన్ని కమర్షియల్‌ అంశాలు ఉండటం, వేసవి సీజన్‌ కావడం సినిమాకి మరింతగా కలిసొచ్చింది. సినిమాకి వచ్చిన టాక్‌ని సద్వినియోగం చేసుకొనేందుకు నారా రోహిత్‌ రంగంలోకి దిగాడు.

రోహిత్‌ స్వయంగా నిర్మించిన చిత్రం కావడంతో ప్రచార కార్యక్రమాలపై ప్రత్యేకంగా దృష్టి పెట్టి సక్సెస్‌ టూర్‌ని కొనసాగిస్తున్నారు. జూన్‌ 8న వైజాగ్‌, అనకాపల్లి, జగ్గంపేటతో మొదలైన నారా రోహిత్‌ టూర్‌ జూన్‌ 9న మండపేట, రాజమండ్రి, తణుకు, భీమవరం, ఏలూరుల్లో సాగింది. ముఖ్యంగా రాజమండ్రిలో అయితే నారా రోహిత్‌కి ప్రేక్షకులు నీరాజనం పలికారు. అభిమానుల నుంచి భారీ స్పందన లభించింది. ఓ పెద్ద హీరోకి లభించే ఆదరణ ఎలా ఉంటుందో ఆ స్థాయిలో జనం ఆయన్ని చుట్టుముట్టారు. ఆ స్పందనని చూసి 'అసుర' టీమ్‌ సంతృప్తిని వ్యక్తం చేసింది.

టూర్‌తో ఆయా ప్రాంతాల్లో మరిన్ని వసూళ్లు పెరుగుతాయని ట్రేడ్‌ వర్గాలు కూడా చెబుతున్నాయి. జూన్‌ 10న అంటే ఈ రోజు విజయవాడ, చిలకలూరిపేట, ఒంగోలు, కావలి, నెల్లూరు, నాయుడుపేటల్లో నారా రోహిత్‌ సక్సెస్‌ టూర్‌ సాగుతుంది. మొత్తంగా రోహిత్‌కి 'అసుర' ఓ గొప్ప మలుపుని ఇస్తుందనడంలో ఏమాత్రం సందేహం లేదు. దర్శకుడు కృష్ణ విజయ్‌ కూడా ఈ చిత్రంతో పరిశ్రమ దృష్టిని ప్రత్యేకంగా ఆకర్షిస్తున్నాడు.