హార్రర్ కామెడీలో నారా రోహిత్

మంచి కంటెంట్ ఉన్న.. వైవిధ్యమైన కథలు ఎంచుకుంటూనే శరవేగంగా సినిమాలు చేస్తుంటాడు నారా రోహిత్. ఈ ఏడాది ఇప్పటికే నారా రోహిత్ ‘శమంతకమణి’తో పలకరించాడు. ‘కథలో రాజకుమారి’ విడుదలకు సిద్ధంగా ఉంది. ‘బాలకృష్ణుడు’ కూడా ముగింపు దశలో ఉంది. ఈ సినిమా పూర్తవగానే ఇంకో రెండు సినిమాలకు శ్రీకారం చుట్టబోతున్నాడు రోహిత్. అందులో ఒకటి తనతో ‘సావిత్రి’ తీసిన పవన్ సాధినేని రూపొందించబోయే ‘భీముడు’. ఈ సినిమాను కొన్ని నెలల కిందటే అనౌన్స్ చేశారు. ఇది పట్టాలెక్కడానికి కొంచెం ఆలస్యమైంది. దసరా సందర్భంగా ఈ సినిమాకు ఘనంగా ప్రారంభోత్సవం జరిపించనున్నట్లు సమాచారం.

‘భీముడు’ ఒక హార్రర్ కామెడీ సినిమా అని సమాచారం. కాకపోతే రెగ్యులర్ హార్రర్ కామెడీల్లాగా ఉండదట. ట్రీట్మెంట్ కొంచెం భిన్నంగా ఉంటుందని సమాచారం. ఈ చిత్రంతో ఓ కొత్త నిర్మాత ఇండస్ట్రీకి పరిచయం కానున్నాడు. రోహిత్-పవన్ కాంబినేషన్లో వచ్చిన తొలి సినిమా ‘సావిత్రి’ కొంచెం వైవిధ్యంగానే అనిపించినా.. జనరంజకంగా తయారవ్వలేదు. ఈసారి మాత్రం హిట్టు కొట్టి తీరాలనే పట్టుదలతో బరిలోకి దిగుతోందీ జంట. దసరా రోజే ఈ సినిమాకు సంబంధించిన పూర్తి వివరాలు వెల్లడవుతాయి. మరోవైపు తన తొలి సినిమా ‘బాణం’ రూపొందించిన చైతన్య దంతులూరి దర్శకత్వంలోనూ రోహిత్ ఓ సినిమా చేయబోతున్నాడు. ఆ సినిమా కూడా త్వరలోనే పట్టాలెక్కుతుంది.