దోస్త్ మేరా దోస్త్ అంటున్న నారా రోహిత్!

మొన్నే ఫ్రెండ్షిప్ డే జరిగింది. సెలబ్రిటీలు వాళ్ళ స్టైల్ లో సోషల్ మీడియా లో శుభాకాంక్షలు చెప్పి సెలబ్రేట్ చేసుకుంటే సాధారణ్ జనాలు ఫ్రెండ్షిప్ బ్యాండ్ లో కట్టుకుని మరోలా సెలబ్రేట్ చేసుకున్నారు. ఇదిలా ఉంటే టీవీ చానల్స్ మాత్రం ఫ్రెండ్షిప్ నిదర్శనంగా నిలిచే చార్ట్ బస్టర్స్ అయిన 'ముస్తఫా ముస్తఫా డోంట్ వర్రీ ముస్తఫా'... దోస్త్ మేరా దోస్త్ నువ్వే నా ప్రాణం' లాంటి పాటలను తిప్పి తిప్పి వేస్తూ పండగ చేసుకున్నాయి. ఇవన్నీ ఒక్క 'ఫ్రెండ్ షిప్ డే' రోజు మాత్రమే. తర్వాత రోజునుండి ముస్తఫా ఉండడు.. దోస్తు అసలే ఉండడు!

కానీ, కొంతమంది 365 రోజులు ఫ్రెండ్సే.. ఉత్త ఫ్రెండ్స్ కాదు జిగ్రీ జాన్లు. అలాంటి వాళ్ళలో టాలీవుడ్ హీరోలు నారా రోహిత్ - శ్రీ విష్ణులు తప్పనిసరిగా ఉంటారు. వాళ్ళు ముస్తఫా పాట పాడతారో లేదో తెలీదు కానీ ఫ్రెండ్స్ ఇలా ఉండాలి అనేందుకు మాత్రం ఓ ఉదాహరణగా నిలుస్తారు. ఇప్పటికే శ్రీ విష్ణు నటించిన సినిమాలకు నారా రోహిత్ నిర్మాతగా వ్యవహరించిన సంగతి తెలిసిందే. ఇప్పుడు తన స్నేహితుడి కోసం తను చేయాల్సిన స్క్రిప్టును కూడా ఇచ్చాడని ఫిలిం నగర్లో టాక్ వినిపిస్తోంది.

రోహిత్ డెబ్యూ సినిమా 'బాణం' దర్శకుడు చైతన్య దంతులూరి రోహిత్ కోసం 'బలవంతుడు నాకేమని' అనే స్క్రిప్ట్ రెడీ చేశాడట. ఆ సినిమాలో రోహిత్ నటించాల్సి ఉన్నప్పటికీ ఆ స్క్రిప్ట్ ను శ్రీ విష్ణుకు ఇచ్చాడట రోహిత్. అలా అని చైతన్య దంతులూరి తో మరో సినిమా లేదని మీరు ఫిక్స్ కాకండి. ఎందుకంటే.. అతనితో మరో సినిమా చేస్తాడట. దీంతో రోహిత్ - శ్రీ విష్ణు ల ఫ్రెండ్ షిప్ టాక్ అఫ్ టాలీవుడ్ అయ్యింది. దోస్తు దోస్తు అంటూనే దోస్తు రోడ్డు మీదకు లాగేతవరకూ నిద్రపోని ఈ రోజుల్లో ఇంకా ఇలాంటి మంచి స్నేహం మిగిలుందా? అందుకే ఈ ప్రపంచం ఇంకా ఇలా ఉంది లేకుంటే ఎప్పుడో మటాషే..!