29న వచ్చేస్తున్న నారా 'రాజా'

ప్రస్తుతం టాలీవుడ్ లో హీరో నారా రోహిత్ ఉన్నంత స్పీడ్ లో మరే హీరో లేడని చెప్పాల్సిందే. ఇప్పటికే ఈ సమ్మర్ లో రెండు సినిమాలను రిలీజ్ చేసిన ఈ నారావారబ్బాయి.. ఇప్పుడు మూడో మూవీని విడుదల చేసేందుకు క్లియరెన్స్ తెచ్చేసుకున్నాడు.

మార్చ్ లో తుంటరి- ఏప్రిల్ 1న సావిత్రిని విడుదల చేయగా.. ఇప్పుడు రాజా చెయ్యి వేస్తే రిలీజ్ కు అన్ని అడ్డంకులు తొలగిపోయాయి. నారా రోహిత్ - ఇషా తల్వార్ జంటగా నటించిన 'రాజా చెయ్యి వేస్తే' సెన్సార్ కార్యక్రమాలు పూర్తి చేసుకుంది. కొన్ని చిన్న చిన్న కట్స్ తో ఈ చిత్రానికి యూ/ఏ సర్టిఫికెట్ జారీ చేసింది సెన్సార్ బోర్డ్. ఈ చిత్రం నందమూరి నారా అభిమానులకు సంథింగ్ స్పెషల్ కానుంది. ఇందుకు కారణం.. నందమూరి తారకరత్న రాజా చెయ్యి వేస్తేలో విలన్ గా నటించడమే.

రాజా చెయ్యి వేస్తే మూవీని ఈ నెల 29 విడుదల చేయాలని నిర్ణయించాడు నారా రోహిత్. అంటే ఏప్రిల్ నెలలో రెండు సినిమాలు రిలీజ్ చేసేస్తున్నాడన్న మాట. బహుశా ఈ ఫీట్ ని అందుకోవడం మరే హీరోకి ఇప్పట్లో సాధ్యం కాదనుకుంటా.