సావిత్రి.. అమెరికాకు వెళ్లిపోయింది

‘ఊపిరి’ సినిమా సమ్మర్ కు అదిరిపోయే ఆరంభాన్నిచ్చింది. ఈ సినిమా అందరి ప్రశంసలు అందుకుంటూ.. అద్భుతమైన కలెక్షన్లతో దూసుకెళ్తోంది. ఇక ఏప్రిల్ 8న పవర్ స్టార్ పవన్ కళ్యాణ్ రంగంలోకి దిగిపోతాడు. మధ్యలో ఖాళీగా ఉన్న శుక్రవారం చాలా సినిమాలే బరిలో ఉన్నాయి. వాటన్నింట్లోకి అత్యంత ఆసక్తి రేపుతున్న చిత్రం ‘సావిత్రి’.

నారా రోహిత్-నందిత జంటగా ‘ప్రేమ ఇష్క్ కాదల్’ ఫేమ్ పవన్ సాధినేని రూపొందించిన ఈ సినిమాపై మంచి అంచనాలే ఉన్నాయి. ఏప్రిల్ 1న రాబోతున్న ఈ చిత్రాన్ని రోహిత్ కెరీర్లోనే అత్యధిక థియేటర్లలో రిలీజ్ చేయడానికి సన్నాహాలు చేస్తున్నారు. ఆల్రెడీ ఈ చిత్రానికి సెన్సార్ కూడా పూర్తయింది. క్లీన్ ఫ్యామిలీ ఎంటర్టైనర్ గా తెరకెక్కిన ఈ చిత్రానికి సెన్సార్ బోర్డు ‘క్లీన్ యు’ సర్టిఫికెట్ ఇచ్చింది.

‘సావిత్రి’ ఓవర్సీస్ లో కూడా పెద్ద ఎత్తునే రిలీజ్ కాబోతోంది. సెన్సార్ అవ్వగానే సావిత్రి డిస్కులు అమెరికాతో పాటు అన్ని ఓవర్సీస్ టెరిటరీలకు డిస్పాచ్ చేసేశారు. 31న అక్కడ ప్రిమియర్స్ కూడా పడబోతున్నాయి. మరోవైపు తెలుగు రాష్ట్రాల్లోని థియేటర్లకు కూడా క్యూబ్, పీఎక్స్ డీ ప్రింట్లను పంపేశారు. టీజర్.. ట్రైలర్..అన్నీ ఆసక్తికరంగా ఉండటంతో ‘సావిత్రి’పై మంచి అంచనాలున్నాయి. కథాబలం ఉన్న సినిమాలు చేసే రోహిత్.. కెరీర్లోనే బిగ్గెస్ట్ కొడతాడని అభిమానులు అంచనా వేస్తున్నారు.