నారా రోహిత్ కు తోడు దొరికాడు

అవును నారా రోహిత్ కు తోడు దొరికాడు. కమెడియన్ టర్న్డ్ డైరెక్టర్ అవసరాల శ్రీనివాస్ దర్శకత్వంలో నారా రోహిత్ నటించబోతున్న ‘జ్యో అచ్యుతానంద’ సినిమా కోసం మరో కథానాయకుడి కోసం చూస్తున్న సంగతి తెలిసిందే. ఈ పాత్రకు నాగశౌర్యను ఎంపిక చేశారు. ఇంకా హీరోయిన్ని మాత్రం ఎంపిక చేయలేదు. డిసెంబర్ లో ఈ సినిమా సెట్స్ మీదికి వెళ్లనుంది. రోహిత్ ఇంకో హీరోతో కలిసి చేయబోతున్న తొలి సినిమా ఇదే కానుంది.

ఈగ - అందాల రాక్షసి - లెజెండ్ - ఊహలు గుసగుసలాడే లాంటి సినిమాలతో మంచి పేరు సంపాదించిన సాయి కొర్రపాటి ‘వారాహి చలనచిత్రం’ బేనర్ పై ఈ చిత్రాన్ని నిర్మిస్తున్నారు. ఈ బేనర్ లోనే ‘ఊహలు గుసగుసలాడే’ సినిమాతో దర్శకుడిగా పరిచయమయ్యాడు అవసరాల. నాగశౌర్య కూడా ఈ సినిమాతోనే హీరోగా పేరు సంపాదించాడు.

‘జ్యో అచ్యుతానంద’ అనేది జ్యోతి - అచ్యుతరావు - ఆనందరావు అనే ముగ్గురు వ్యక్తుల మధ్య సాగే కథ అని అవసరాల ఇంతకుముందే చెప్పాడు. అంటే రోహిత్ - శౌర్య.. అచ్యుతరావు - ఆనందరావు అనే పాత్రల్లో ఒక్కొక్కటి పోషిస్తారన్నమాట. ఇక జ్యోతి సంగతే తేలాల్సి ఉంది. ఈ చిత్రానికి కళ్యాణి మాలిక్ సంగీతాన్నందిస్తాడు. దీంతో పాటు వారాహి బేనర్ లోనే రోహిత్ ఇంకో సినిమా చేయాల్సి ఉంది.