బాలయ్య సపోర్ట్ తోనే ఈ స్థాయి - నారా రోహిత్

నారా వారబ్బాయి రోహిత్ వరుస సినిమాలతో దూసుకుపోతున్నాడు. ప్రస్తుతం ఈ కుర్ర హీరో నటించిన సావిత్రి మూవీకి ఆడియో ఫంక్షన్ అంగరంగ వైభవంగా జరిగింది. బాలయ్య ముఖ్య అతిథిగా రావడం, నందమూరి వంశం నుంచి మరో హీరో తారకరత్న కూడా విచ్చేయడంతో.. నందమూరి, నారా అభిమానులకు ఓ పెద్ద పండగ తలపించింది.

'సినిమాల్లోకి వచ్చాక బాలయ్య మామయ్య చాలా సపోర్ట్ చేశారు. బాణం తర్వాత నుంచి ఎలాంటి సినిమాలు చేస్తావ్ అని ఆరా తీసేవారు. ఈ సినిమాకి ఆయన బ్లెస్సింగ్స్ తీసుకుంటున్నాం' అంటూ బాలకృష్ణ మీద అభిమానాన్ని గౌరవాన్ని చాటుకున్నాడు నారా రోహిత్. ఈ సినిమా ప్రారంభించడానికి కొన్ని కష్టాలు ఎదుర్కున్నామని, ప్రాజెక్ట్ ఫైనల్ అయినా.. మొదట్లో ఇబ్బంది పడ్డమాట వాస్తవమేనని చెప్పాడు. అయితే ఇంత పర్ఫెక్ట్ గా ఫినిష్ అవడానికి కారణం నిర్మాత రాజేంద్రప్రసాద్ అని పొగిడాడు రోహిత్.

భారీ కాస్టింగ్ తో ఈ మూవీ చేశామని.. సావిత్రి సినిమాకు దర్శకుడి తర్వాత రైటర్ చాలా ఇంపార్టెంట్ అన్న రోహిత్.. తన రౌడీ ఫెలో కు దర్శకత్వం వహించిన డైరెక్టర్ కృష్ణ చైతన్య మాటలు ఇచ్చాడని చెప్పాడు. హీరోయిన్లు నందిత , ధనియా బాలకృష్ణలతో పాటు నందిత - సత్యం రాజేష్ - షకలక శంకర్ వంటి అనేక మంది ఉంటారని చెప్పాడు. ఇంతమందితో పవన్ సాదినేని దర్శకత్వం వహించిన తీరు బాగా నచ్చిందన్న రోహిత్... మ్యూజిక్ డైరెక్టర్ శ్రవణ్ అద్భుతమైన సంగీతం ఇచ్చాడని అన్నాడు. సోలో తర్వాత తనకు అంతటి సినిమా సావిత్రి అంటూ.. జై బాలయ్య అంటూ తన స్పీచ్ ని కంప్లీట్ చేశాడు నారా రోహిత్.