నారా, అక్కినేని అబ్బాయిల అటాక్

కెరీర్ ఆరంభం నుంచి వైవిధ్యమైన పాత్రలతో దూసుకెళ్తున్నాడు నారా రోహిత్. ప్రస్తుతం అతను హీరోగా అరడజనుకు పైగా సినిమాలు సెట్స్ మీద ఉండటం విశేషం. వీటిలో ముందు ‘తుంటరి’ ప్రేక్షకుల ముందుకు రానుంది. రోహిత్ నటిస్తున్న తొలి రీమేక్ మూవీ ఇదే కావడం విశేషం. మురుగదాస్ కథతో తెరకెక్కిన ‘మాన్ కరాటె’కు ఇది రీమేక్. గుండెల్లో గోదారి - జోరు సినిమాల ఫేమ్ నాగేంద్ర ప్రసాద్ ఈ చిత్రానికి దర్శకుడు. లతా హెగ్డే అనే కొత్తమ్మాయి ఈ చిత్రంలో హీరోయిన్ గా నటిస్తోంది. ఇప్పటికే పోస్టర్లతో సందడి చేసిన ‘తుంటరి’ మూవీ ఇప్పుడు ఫస్ట్ లుక్ టీజర్ తో రాబోతోంది. శుక్రవారం ఉదయం 10.30 గంటలకు ‘తుంటరి’ ఫస్ట్ లుక్ టీజర్ విడుదలవుతుంది.

మరోవైపు అక్కినేని కథానాయకుడు నాగచైతన్య కొత్త సినిమా ‘సాహసం శ్వాసగా సాగిపో’ సింగిల్ టీజర్ ను ఈ ఆదివారం రిలీజ్ చేయబోతున్నాడు. ఇప్పటికే రెండు టీజర్లతో సందడి చేశాడు చైతూ. ఐతే ఈ మూవీ మ్యూజిక్ జనాలకు ఇప్పటిదాకా పరిచయం కాలేదు. తమిళంలో టీజర్ తో పాటే ఓ మాంచి పాటను కూడా బ్యాగ్రౌండ్ లో వినిపించారు. అది జనాల్ని విపరీతంగా ఆకట్టుకుంది. ఎ.ఆర్.రెహమాన్ ముద్ర ఆ పాటలో స్పష్టంగా కనిపించింది. ఇప్పుడా పాటనే తెలుగులో స్పెషల్ గా రిలీజ్ చేయబోతున్నారు. గౌతమ్ వాసుదేవ మీనన్ దర్శకత్వం వహించిన ఈ సినిమాలో మలయాళ భామ మాంజిమా మోహన్ కథానాయికగా నటిస్తోంది. తమిళంలో ఇదే సినిమాను శింబు హీరోగా తెరకెక్కిస్తున్నాడు గౌతమ్. ఏప్రిల్లో ఈ చిత్రం ప్రేక్షకుల ముందుకొస్తుంది.