యంగ్ 'నారప్ప' ఇలా.. 'ఖిలాడి' అలా..!

నేడు మహాశివరాత్రి పర్వదినాన్ని పురస్కరించుకుని టాలీవుడ్ లో కొత్త సినిమాలకు సంబంధించిన అప్డేట్స్ ఇస్తూ వస్తున్నారు. టీజర్ ట్రైలర్స్ తో పాటు స్పెషల్ పోస్టర్స్ రిలీజ్ చేస్తూ పండుగ శుభాకాంక్షలు తెలియజేస్తున్నారు. ఈ క్రమంలో విక్టరీ వెంకటేష్ నటిస్తున్న 'నారప్ప' మరియు మాస్ మహారాజా రవితేజ 'ఖిలాడి' చిత్రాల నుంచి న్యూ పోస్టర్స్ వదిలారు.

శ్రీకాంత్ అడ్డాల దర్శకత్వంలో వెంకీ నటిస్తున్న యాక్షన్ థ్రిల్లర్ 'నారప్ప' నుంచి వర్షంలో తడుస్తున్న యంగ్ నారప్ప లుక్ ని తాజాగా విడుదల చేశారు. ఈ చిత్రం తమిళ్ లో ధనుష్ నటించిన సూపర్ హిట్ 'అసురన్' కి రీమేక్ గా రూపొందుతోంది. ఇందులో నారప్ప భార్య సుందరమ్మగా ప్రియమణి నటించగా.. తనయుడిగా కార్తీక్ రత్నం నటించాడు. సురేష్ ప్రొడక్షన్స్ బ్యానర్‌ మరియు వి క్రియేషన్స్ బ్యానర్స్ పై సురేష్ బాబు - క‌లైపులి ఎస్.థాను సంయుక్తంగా ఈ చిత్రాన్ని నిర్మిస్తున్నారు. స్సమ్మర్ కానుకగా మే 14న ఈ సినిమా ప్రేక్షకుల ముందుకు రానుంది.

'రాక్షసుడు' ఫేమ్ ర‌మేష్ వ‌ర్మ దర్శకత్వంలో ర‌వితేజ నటిస్తున్న లేటెస్ట్ యాక్షన్ ఎంటర్టైనర్ 'ఖిలాడి' నుంచి ఓ స్టైలిష్ పోస్టర్ రిలీజ్ చేశారు. ఇందులో రవితేజ సూట్ వేసుకొని చేతిలో గన్ పట్టుకొని కోపంగా చూస్తూ నిలబడి ఉన్నాడు. ర‌వితేజ డ్యూయల్ రోల్ లో కనిపిస్తున్న ఈ చిత్రంలో మీనాక్షి చౌధ‌రి - డింపుల్ హ‌య‌తి హీరోయిన్లుగా న‌టిస్తున్నారు. పెన్ స్టూడియోస్‌ జయంతి లాల్‌ గడ సమర్పణలో హవీష్‌ ప్రొడక్షన్స్‌ బ్యానర్‌ పై సత్యనారాయణ కోనేరు ఈ చిత్రాన్ని నిర్మిస్తున్నారు. మే 28న 'ఖిలాడి' చిత్రాన్ని విడుదల చేయనున్నారు.