'నారప్ప' సెన్సార్ రిపోర్ట్ ఏమి చెప్తోంది..?

విక్టరీ వెంకటేష్ హీరోగా నటించిన లేటెస్ట్ మూవీ ''నారప్ప''. ఇప్పటికే షూటింగ్ పూర్తి చేసుకున్న ఈ చిత్రాన్ని మే 14న విడుదల చేయాలని మేకర్స్ భావించారు. కానీ కరోనా సెకండ్‌ వేవ్‌ కారణంగా సినిమా విడుదల వాయిదా వేసుకున్నారు. కోవిడ్ నేపథ్యంలో పూర్తి స్థాయిలో థియేటర్లు ఎప్పుడు తెరుచుకుంటాయనే విషయంపై క్లారిటీ లేకపోవడంతో ‘నారప్ప’ చిత్రాన్ని డైరెక్ట్ ఓటీటీలో రిలీజ్‌ చేయడానికి డిసైడ్ అయ్యారని తెలుస్తోంది.

ప్రముఖ ఓటీటీ ఫ్లాట్‌ ఫామ్‌ అమెజాన్‌ ప్రైమ్‌ వీడియో వేదికగా జులై 24న 'నారప్ప' చిత్రాన్ని డిజిటల్ రిలీజ్ చేస్తారని వార్తలు వస్తున్నాయి. దీనిపై ఇంకా ఎలాంటి అధికారిక ప్రకటన వెలువడనప్పటికీ, ఇదే కన్ఫర్మ్ అని టాక్ నడుస్తోంది. ఈ నేపథ్యంలో 'నారప్ప' సినిమా సెన్సార్ కార్యక్రమాలు కూడా పూర్తైనట్లు తెలుస్తోంది. సమాజంలోని కుల వ్యవస్థ వంటి సామాజిక అంశాలతో రూపొందించబడిన ఈ చిత్రానికి 'U/A' సెన్సార్ సర్టిఫికేట్ జారీ చేశారు.

'నారప్ప' చిత్రానికి శ్రీకాంత్ అడ్డాల దర్శకత్వం వహించారు. 'సీతమ్మ వాకిట్లో సిరిమల్లెచెట్టు' వంటి బ్లాక్ బస్టర్ తర్వాత వెంకటేష్ - శ్రీకాంత్ అడ్డాల కాంబోలో వస్తున్న ఈ చిత్రంపై మంచి అంచనాలే ఉన్నాయి. ఇది తమిళ బ్లాక్ బస్టర్ హిట్ 'అసురన్' చిత్రానికి అఫిసియల్ తెలుగు రీమేక్. వెంకటేశ్‌ ఇందులో యువకుడిగా మధ్య వయస్కుడిగా రెండు విభిన్నమైన పాత్రల్లో కనిపించనున్నాడు. ఆయనకు జోడీగా ప్రియమణి నటించింది. వి క్రియేషన్స్ మరియు సురేష్ ప్రొడక్షన్స్ పతాకాలపై క‌లైపులి ఎస్.థాను - సురేష్ బాబు కలసి 'నారప్ప' చిత్రాన్ని నిర్మిస్తున్నారు.