సితార బ్యానర్ లో జాతీయ ఉత్తమ నటుడు ద్విభాషా చిత్రం..!

కోలీవుడ్ స్టార్ హీరో ధనుష్ డబ్బింగ్ సినిమాలతో తెలుగు ప్రేక్షకులకు దగ్గరయ్యారు. ఇటీవలే శేఖర్ కమ్ముల దర్శకత్వంలో ఓ స్ట్రెయిట్ తెలుగు సినిమా అనౌన్స్ చేసిన సంగతి తెలిసిందే. ఏషియన్ వారు నిర్మించే ఈ మూవీ సెట్స్ మీదకు వెళ్లకముందే, నేషనల్ అవార్డ్ విన్నింగ్ యాక్టర్ మరో తెలుగు చిత్రానికి కమిట్ అయ్యారని చాలా రోజులుగా వార్తలు వస్తున్నాయి.

ప్రముఖ నిర్మాణ సంస్థ సితార ఎంటర్టైన్మెంట్స్ బ్యానర్ లో ధనుష్ ఓ సినిమా చేస్తున్నాడని.. వెంకీ అట్లూరి దీనికి దర్శకత్వం వహిస్తారని టాక్ వచ్చింది. అయితే దీన్ని నిజం చేస్తూ ఈరోజు బుధవారం మేకర్స్ ఈ ప్రాజెక్ట్ కు సంబంధించిన అధికారిక ప్రకటన విడుదల చేశారు. ధనుష్ హీరోగా వెంకీ అట్లూరి దర్శకత్వంలో ఓ తెలుగు తమిళ ద్విభాషా చిత్రాన్ని రూపొందించనున్నట్లు వెల్లడించారు.

''తెలుగు మరియు తమిళంలో రూపొందనున్న ప్రతిష్టాత్మక చిత్రం కోసం జాతీయ అవార్డు గ్రహీత నటుడు ధనుష్ తో జతకట్టడం మాకు ఆనందంగా ఉంది'' అని నిర్మాతలు తెలిపారు. 'తొలిప్రేమ' 'మిస్టర్ మజ్ను' 'రంగ్ దే' వంటి చిత్రాలను తెరకెక్కించిన వెంకీ అట్లూరి.. ధనుష్ కోసం ఓ వైవిధ్యమైన కథను రెడీ చేసినట్లు తెలుస్తోంది.

పీడీవీ ప్రసాద్ సమర్పణలో సితార ఎంటర్టైన్మెంట్స్ బ్యానర్ లో ప్రొడక్షన్ నెం.14 గా ఈ సినిమా రానుంది. ఫార్చ్యూన్ ఫోర్ సినిమాస్ నిర్మాణంలో భాగస్వామ్యం అయ్యారు. సూర్యదేవర నాగవంశీ మరియు దర్శకుడు త్రివిక్రమ్ శ్రీనివాస్ సతీమణి సౌజన్య సంయుక్తంగా ఈ చిత్రాన్ని నిర్మించనున్నారు. ఈ సినిమాకు సంబంధించిన టైటిల్ మరియు ఫస్ట్ లుక్ పోస్టర్ ని రేపు గ్గురువారం (డిసెంబర్ 23) ఉదయం 9.36 గంటలకు విడుదల చేయనున్నట్లు మేకర్స్ తెలిపారు.

ఇకపోతే శేఖర్ కమ్ముల దర్శకత్వంలో ధనుష్ చేయబోయే థ్రిల్లర్ చిత్రాన్ని.. తెలుగు తమిళ హిందీ భాషల్లో భారీ స్థాయిలో రూపొందించనున్నారు. సోనాలి నారంగ్ సమర్పణలో శ్రీ వెంకటేశ్వర సినిమాస్ బ్యానర్ పై నారాయణ్ దాస్ నారంగ్ - పి. రామ్మోహన్ రావు ఈ సినిమాని నిర్మించనున్నారు. ఇప్పుడు వెంకీ అట్లూరి డైరెక్టన్ లో బైలింగ్విల్ ప్రాజెక్ట్ కు శ్రీకారం చుడుతున్నారు. మరి ఈ రెండింటిలో ఏది ధనుష్ తెలుగు డెబ్యూ మూవీగా రాబోతుందో చూడాలి.